SEKOMS halo abertura kampaña nasionál kombate hoax promove internet saudável nivel munisípiu sira hahú hosi Munisípiu Lautem, Imajen Tatoli/Arminda Fonseca

DILI, 17 setembru 2021 (TATOLI)-Sekretariadu Estadu Komunikasaun Sosiál (SEKOMS), sesta ne’e, halo abertura kampaña nasionál kombate hoax, promove internet saudavel ba nivel munisípiu sira hahú hosi Munisípiu Lautem.

Sekretáriu Estadu Komunikasaun Sosiál, Merício Juvinal ‘Akara’, hateten objetivu lansa kampaña nasionál kombate hoax, promove internet saudavel ba nivel munisípiu hahú hosi Lautem tanba hakarak atu kombate lia-falsu iha Timor-Leste nune’e sidadaun-sira uza internet ho matenek hodi dezenvolve Timor-Leste.

“Ita hatene katak buat ida hoax ne’e mosu antes ka tempu feudalizmu nian. Maibé iha agora tempu era dijitál ka ema hotu asesu plataforma dijitál, ita kontente bainhira ita-nia sidadaun sira uza internet promove sira-nia matenek, talentu no aprende matenek barak hosi rai li’ur maibé sidadaun balu uza sala hamosu lia-falsu barak iha mídia sosiál liuliu Facebook tanba ne’e ita hakarak fó hanoin katak internet ajuda ita bele hatene buat hotu maibé ita uza la kuidadu sei fó dezastre ba ita hanesan ita la rona malu no ita-nia nasaun sei prodús ho lia-falsu sai nakonu ho hoax,” Akara hateten bainhira halo lansamentu programa kampaña nasionál kombate hoax, promove internet saudavel ba nivel munisípiu sira iha salaun ANC- Ministériu Transporte no Komunikasaun, Merkadu Lama, Dili.

Atu kombate hoax iha Timor-Leste kampaña nasionál kombate hoax promove, internet saudavel ne’e labele la’o iha nasionál de’it, maibé tenke to’o ba munisípiu sira, nune’e fó hanoin ba joven-sira sira uza internet ho saudavel.

Nune’e Vise Ministru Edukasaun Juventude no Desportu MEJD, António Guterres hateten, baze fundamental hamosu hoax iha Timor-Leste tanba menus konsiénsia sidadaun nian bainhira uza internet, tanba atu uza internet saudavel ne’e hahú hosi sidadaun ida-idak ne’ebé uza plataforma dijitál.

“Hosi parte edukasaun nian, ba oin sei haree no ko’alia profesór sira, nune’e, hanorin estudante sira oinsá atu uza internet ho di’ak, liuliu husu mós ba inan-aman halo kontrolu no kuidadu oan sira uza internet ho saudavel,” nia hateten.

Nia  dehan, ba oin sei halo sosializasaun kona-ba ba promove internet saudável no MEJD rasik mós presiza lori programa kampaña Nasionál kombate hoax promove internet saudavel ne’e hakbesik ba profesór sira, nune’e, sira mós iha kõnesementu atu hanorin estudante sira ho di’ak tanba iha Ensinu Sekundária sira mós iha matéria tékniku informátika.

Liuhosi gravasaun Administradór Munisípiu Lautém, Domingos Savio, nian ne’ebé fó sai hateten katak, lansamentu kampaña nasionál kombate hoax promove internet saudavel ba Munisípiu Lautem ne’e importante liuliu iha tempu COVID-19 agora ne’e.

“Ita hatene katak komunidade iha área remotas, dala-barak, fiar liu hoax atu vasina ne’e ta’uk tanba mídia sira mós kobertura la kobre to’o iha área remotas entaun komunidade menus informasaun tanba ne’e ami presiza tebes mídia sira to’o fatin remotas, nune’e komunidade labale fiar ba hoax,” nia hateten.

Kampaña Nasionál kombate hoax promove internet saudavel ne’e ohin hahú abertura ba Munisípiu Lautem ba oin sei kontinua ba munisípiu sira seluk.

Iha kampaña nasionál kombate hoax promove internet saudavel ba nivel munisípiu sira ne’e hetan prezensa hosi Vise-Ministru Edukasaun Juventude no Desportu MEJD António Guterres, Pe. Mouzinho Lopes, no entidade sira seluk tan.

Jornalista   : Arminda Fonseca

Editór        : Francisco Simões

HAKEREK NO HATÁN

Please enter your comment!
Please enter your name here