Ministériu Turizmu Komérsiu no Indústra (MTK) asina akordu ho Koordenadór Grupu Traballu dezenvolve turizmu komunitáriu iha suku lima, iha salaun MTKI, Farol, sesta (17/09). Imajen TATOLI/Francisco Sony

DILI, 17 setembru 2021 (TATOLI)–Ministru Turizmu, Komérsiu no Indústria (MTKI), José Lucas do Carmo da Silva, asina akordu subvensaun públika ho grupu traballu iha suku lima hodi insentiva programa dezenvolve turizmu komunitáriu.

Iha biban ne’e, Ministru husu ba grupu traballu sira atu implementa programa ho di’ak, nune’e bele garante sustentabilidade iha futuru.

Ministru Turizmu, Komérsiu no Indústra, José Lucas Do Carmo Da Silva, asina nota entedimentu ho Koordenadór Grupu Traballu Turizmu Komunitáriu WARDA Maubisse, Joaquim de Fatima Coutinho, iha salaun MTKI, Farol, sesta (17/09). Imajen TATOLI/Francisco Sony

“Kestaun boot ba ita hotu maka responsablidade no kualidade ba prorgrama ne’e,” Ministru José Lucas, hateten iha durante seremónia asina akordu, iha salaun MTKI, Farol, sesta ne’e.

Orsamentu ne’ebé ministériu fó liuhosi transferénsia públika ba suku lima ho montante la hanesan, suku Uailili, postu administrativu Baucau villa hetan osan $100.200, suku Maubisse, postu adminstrativu Ainaro villa hetan $41.070, suku Nunumoge, postu administrativu Viqueque villa, hetan osan ho montante $49.765, suku Uaimoritula, postu administrativu Viqueque villa hetan osan $16,000, no suku Seloi, postu administrativu Aileu hetan osan $49.900.

Turizmu Komunitáriu sira hanesan Uiasarake Uai-Lili, Lavadain Kreativu Uaimori Viqueque, Haut-Ana Seloi, AST Robena Nunu-Moge, Warda Maubisse.

Notísia relevante: MTKI hili suku lima sai pilotu programa dezenvolvimentu turizmu komunitáriu

Ministru Turizmu, Komérsiu no Indústria, José Lucas do Carmo Da Silva, asina nota entedimentu ho ho Koordenadór Grup, Haut-Anan Seloi Aileu, Jeremias da Costa, iha salaun MTKI, Farol, sesta (17/09). Imajen TATOLI/Francisco Sony

Ho nune’e, governate ne’e husu grupu traballu no Prezidente Konsellu Konsultivu ba programa implementasaun turizmu komumitáriu iha suku lima, tenke halo tuir prioridade ne’ebé mensiona ona iha proposta.

“Se ita-boot tau prioridade ba asuntu ida, tenke konsentra atu dezenvolve duni,” nia akresenta.

Aleinde ne’e, sei iha iha avalisaun ba programa ne’e no grupu traballu ne’ebé daudaun ho apoiu osan tenke hatudu kualidade di’ak no halo servisu ho responsabilidade.

“Sira ne’ebé daudaun ne’e hetan apoiu osan boot, maibé laiha kualidade no halo la ho responsabilidade, apoia ba sira sei tun oitoan, ne’e depende ba avalisaun hosi Ministériu Turizmu, Komérsiu no Indústria ba implemtasaun programa,” Ministru dehan.

Iha fatin hanesan, Reponsável ba grupu traballu suku Seloi, Manuel da Silva, agradese ba Governu tanba bele iha inisiativa atu realiza programa, tanba ne’e nia parte ho ekipa komprometidu  sei halo serbisu ho di’ak.

”Buat ida-ne’e maka ami hein duni. Ha’u agradese tebes ba VIII Governu tanba foin maka realiza programa hanesan ne’e,” nia hatutan.

Nia konsidera, programa dezenvolvimentu turizmu komunitáriu, bele halo komunidade iha  baze sente duni dezenvolvimentu.

Turizmu komunitáriu no kulturál ho modalidade turizmu ne’ebé iha karater relevánsia komunitária, ho prinsípiu partisipasaun direta komunidade, ba inkluzaun sosiál, sustentabilidade no dezenvolvimentu ekonómiku lokál ho atividade turíztika rurál, relijiozu, kulturál, istóriku, ekoturizmu no servisu turíztiku lokál.

Jornalista : Natalino Costa

Editora      : Julia Chatarina

HAKEREK NO HATÁN

Please enter your comment!
Please enter your name here