Ilustrasaun ema tuir formasaun. Imajen/Espesiál.

DILI, 16 setembru 2021 (TATOLI)–Diretór Sentru Formasaun Institutu Matadalan Integradu (IMI), Joaquim Exposto, informa Sentru Formasaun Institutu Matadalan Integradu (IMI) sei halo abertura formasaun movel iha Ermera iha semana oin.

“Aminia formasaun movel ne’e, ami haruka oráriu formasaun nian ba ona iha DENAFOP, ne’ebé formasaun ne’e ami hahú iha loron 20 semana oin fulan ne’e,” Joaquim Exposto hateten ba Agência Tatoli, via telefónika, kinta ne’e.

Formasaun movel ne’e, benefisiáriu sira maihosi iha suku ketakketak tanba ne’e iha abertura ne’e IMI sei konvida Xefe Suku ne’ebé mak iha suku ne’ebé IMI atu implementa formasaun movel ne’e.

“Formasaun movél hala’o durante loron rua iha suku Dukurai. Hafoin ne’e, ami kontinua mai fali iha suku Humboe. Ami sei konvida Autoridade Lokál mai halo abertura no ikus mai sei hala’o filafali iha suku Riheu. Ne’ebé, aminia formasaun movel ne’e, ami sei realiza iha suku tolu, ne’ebé kada suku formasaun ne’e ho nia durasaun loron rua,” nia esplika.

Iha abertura ba formasaun movel ne’e, sei marka prezensa hosi Autoridade Lokál no mós Sekretária Estadu Formasaun Profisionál no Empregu (SEFOPE), tanba hosi SEFOPE nia prezensa mós atu fó introdusaun jerál uitoan konabá apoiu fundu ba programa formasaun movel ne’e.

Entretantu, totál benefisiáriu 45 mak sei tuir formasaun movel no hosi númeru ne’e mai hosi suku tolu mak suku Dukurai ne’ebé lokaliza iha Postu Administrativu Letefoho no iha munisípiu Ermera mak suku Riheu no Humboe, ne’ebé sei aprende konabá produsaun hortikultura.

Jornalista : Nelia Fernandes

Editór       : Cancio Ximenes

HAKEREK NO HATÁN

Please enter your comment!
Please enter your name here