Prezidente Interinu Autoridade Munisípiu Dili, Atónio Moniz Calau. Imajen Tatoli/Francisco Sony

DILI, 16 setembru 2021 (TATOLI)-Prezidente Interinu Autoridade Munisípiu Dili, António Moniz Clau, informa Governu Sentrál liuhosi Autoridade Munisípiu Dili deside ona atu iha inísiu novembru 2021, taka semitériu Becusse no ema sei la hakoi tan ona mate-isin iha semitériu ne’e.

“Semitériu Becusse agora daudaun iha faze identifikasaun, ita-nia tékniku sira tun halo levantamentu iha terrenu halo predisaun katak semitériu Becusse, ita kobre óbitu na’in-200 hanesan nakonu ona ne’e predisaun ne’e to’o outubru nia rohan signifika hahú  fulan novembru 2021 mai ne’e semitériu Dili laran inklui Becusse ita sei taka hotu, óbitu sira ne’ebé iha fulan novembru nia-laran ita sei hakoi hotu iha semitériu públiku Metinaru,” António Moniz Clau hateten ba Agência Tatoli iha edifísiu Ministériu Administrasaun Estatál (MAE), kinta ne’e.

Nia husu ba komunidade Munisípiu Dili prepara aan, karik to’o fulan novembru ema mate sei la hakoi tan ona ba Becusse maibé lori ba hakoi semitériu públiku Metinaro.

“Semana oin hanesan ne’e ita-nia materiál pezadu sira sei ba semitériu Metinaro atu hadi’a fatin  ne’ebé ita garante katak to’o novembru bele iha ona kondisaun ne’ebé di’ak no mate sira ne’ebé iha fulan novembru ne’e bele hakoi ona iha semitériu refere,” Prezidente Interinu Autoridade Munisípiu Dili ne’e hateten.

Kona-ba prosesu semitériu foun Metinaro, nia dehan, daudaun ne’e  identifika ona rai ektare hamutuk 25, ne’ebé hosi 25 ektare ne’e 12 ektare uza ba semitériu públiku 13 ektare ba semitériu COVID-19.

Jornalista   : Arminda Fonseca

Editór         : Francisco Simões

HAKEREK NO HATÁN

Please enter your comment!
Please enter your name here