Sekretáriu Estadu Kooperativa (SEKoop), Elizário Ferreira, dada lia ho membru Kooperativa CU Domi-huhu, iha suku Ma'abat, kinta (16/09/2021). Imajen TATOLI/Antónia Gusmão

MANATUTO, 16 setembru 2021 (TATOLI)-Kooperativa Kréditu Uniaun (CU, sigla portugés) Domi-huhun halibur ona osan hosi membru sira desde ezisténsia iha tinan 2007 to’o 2021 hamutuk $115.000.

“Ami-nia atividade mak Kréditu Uniaun ka simpan pinjam, signifika rai osan hamutuk no bele empresta filafali, atividade ne’e hahú iha tinan 2007 no daudaun ne’e ninia kapitál $115.000,” Prezidente Kooperativa, Paulos Pelile Lazadjar, relata, iha ámbitu simu vizita hosi Sekretáriu Estadu Kooperativa (SEKoop) Elizário Ferreira, iha sede provizóriu kooperativa iha suku Ma’abat, postu administrativu Manatuto villa, munisípiu Manatuto, kinta ne’e.

Iha inísiu ezisténsia kooperativa ne’e, halibur membru hamutuk na’in-15 no momentu ne’ebá hetan formasaun hosi Diresaun Kooperativa, entaun akumula tan membru, nune’e to’o agora totál membru hamutuk 238.

Responsável ne’e hakuir, kritériu atu sai membru kooperativa, tenke hetan informasaun detallu ligadu ho objetivu rai osan no empréstimu.

Enkuantu, bainhira atu sai membru, tenke kontribui osan dahuluk hamutuk $35 no osan sira ne’ebé rai iha kooperativa, membru de’it maka bele empresta, enkuantu ba ema seluk labele.

“Durante ne’e atividade la’o di’ak maibé iha ámbitu COVID-19 paradu tiha, maibé ami la’o tuir sira hodi husu informasaun. Osan sira ne’ebé membru sira empresta barak liu fó eskola oan no balun halo lia,” nia hatutan.

Ho prezensa membru Governu, Prezidente Kooperativa sente orgullu tebes tanba bele motiva sira atu jere kooperativa ho di’ak liután.

Jornalista : Antónia Gusmão

Editora      : Julia Chatarina

HAKEREK NO HATÁN

Please enter your comment!
Please enter your name here