Formandu sira iha Sentru Dezenvolvimentu Komunitáriu (CDC, sigla portugés) Baucau simu graduasaun iha tinan kotuk. Imajen/Espesiál.

DILI, 16 setembru 2021 (TATOLI)—Sentru Dezenvolvimentu Komunitáriu (CDC, sigla portugés) Baucau, tuir planu iha loron (23/09) tinan ne’e, sei realiza serimónia graduasaun ba formandu na’in30.

“Aminia serimónia graduasaun ne’e, hosi SEFOPE fó hatene fali ona mai ami katak, iha loron kinta (23/09) ne’e bele halo ona serimónia graduasaun ba formandu na’in-30,” Diretór Sentru Dezenvolvimentu Komunitáriu (CDC, sigla portugés) Baucau, Vicente Matos Belo, hateten ba Agência Tatoli, via telefónika, kinta ne’e.

CDC Baucau bele fó graduasaun lalais ba formandu sira tanba iha formandu balun mak atu aplika ba iha programa Pacific Labour Scheme (PLS).

Nia informa, Diretór Sekretária Estadu Formasaun Profisionál no Empregu (SEFOPE) Baucau, ba hasoru direta ho Prezidente Autoridade Munisípiu Baucau kona-bá realizasaun serimónia graduasaun ne’e.

“Tuir ami-nia planu, ami hakarak realiza iha loron sesta-feira, maibé tuir PAM se bele mai oin ka ba fali segunda seluk. Entaun, ami la aseita tanba ami mós iha atividade seluk atu halo,” nia akresenta.

Tanba ne’e, CDC habelar ona konvite ba serimónia graduasaun nian hodi distribui ba iha Dili, hanesan Institutu Nasionál Dezenvolvimentu Mão de Obra (INDMO), SEFOPE, Work For Devenlopment Timor-Leste, no Dirasaun Nasionál Kurikulu Ensinu Supérior.

“Iha konvite hitu (7) mak ami haruka ba iha Díli. Iha Baucau ne’e, ami konvida hanesan Presidente Autoridade Munisípiu Baucau no Diretora Apoia Sosiedade Sivil, Komandante PNTL Baucau, Administradór Postu Baucau Vila, no Diretór SEFOPE,” nia informa.

Entretantu totál formandu na’in30 mak sei tuir serimónia graduasaun ne’ebé maihosi Munisípiu Aileu, Baucau no Viqueque, ne’ebé durante ne’e tuir formasaun iha área agrikultura.

Jornalista : Nelia Fernandes

Editór       : Cancio Ximenes

HAKEREK NO HATÁN

Please enter your comment!
Please enter your name here