Jerente PRADET fatin hakmatek rejionál leste, Joana da Costa. Imajen TATOLI/Natalino Belo

BAUCAU, 15 setembru 2021 (TATOLI)–Jerente Programa Psychosocial Recovery and Development in East Timor (PRADET) fatin hakmatek rejionál leste, Joana da Costa, hateten, hahú janeiru to’o setembru 2021, rejista kazu violénsia bazeia ba jéneru iha rejionál leste hamutuk 235.

“Númeru ne’ebé a’as iha tempu situasaun Estadu Emerjénsia no serka sanitária, ne’ebé kazu sira ne’e mai hosi rejionál lesta hanesan Baucau, Viqueque no Lautém,” Jerente PRADET rejionál Baucau informa ba Agência TATOLI, iha ninia knaar fatin, Villa antiga, kuarta ne’e.

Hosi númeru kazu hirak ne’e, iha kazu 100 resin mai hosi Baucau, ne’ebé mak akontese iha postu neen, tuir kedan iha munisípiu Viqueque no Lautém.

Kauza loloos hosi kazu violénsia bazeia ba jéneru akontese tanba Estadu Emerjénsia no serka sanitária, ne’ebé hamosu uma-laran laiha rendimentu liuliu asesu ba merkadoria, dezempregu barak iha família no violénsia doméstika.

“Iha situasaun ne’e, mane sira lakon servisu tanba kompañia barak mak hakotu kontratu, nune’e fó kontribuisaun boot kazu violénsia doméstika,” Joana akresenta.

Durante asisténsia ba vítima, PRADET fó prioridade uluk atu asegura vítima sira iha situasaun emerjénsia no hetan autorizasaun hosi Ministériu Solidariedade Sosiál no Inkluzaun (MSSI) atu iha espasu ba asesu uma entrada hodi asegura vítima sira liuliu kontrola saúde.

Aleinde ne’e, proteje vítima sira durante loron 14, nune’e iha espasu atu halo aproximasaun ho rede seluk atu fó asisténsia kontinuasaun no iha atividade adisionál ne’ebé hanaran empodariamentu ekonomia família, atu fó apoia ba vítima sira atu sustenta nesesidade uma-laran liuhosi negósiu.

“PRADET nia misaun mak atu fó protesaun ba vítima sira, liuliu iha área psikososiál nian, ligadu ho kazu violénsia doméstika ne’e rasik,” nia subliña.

Iha fulan-setembru ne’e, foin tama semana daruak, PRADET simu ona kazu hamutuk 12, ne’ebé rejista a’as mak abuzu seksuál ba minoridade inklui insestu.

Iha rejionál leste, rejista kazu barak hanesan violénsia doméstika, abuza seksuál, abandona oan no fen, kazu fíziku inklui atendimentu ba ema ho defisiénsia durante serka sanitária.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here