Ministru Ensinu Superiór, Siénsia no Kultura (MESSK), Longuinhos dos Santos. Imajen TATOLI/ Egas Cristóvão

DILI, 15 setembru 2021 (TATOLI) – Ministériu Ensinu Superiór Siénsia no Kultura (MESSK) sei realiza projetu konstrusaun ba instalasaun foun edifísiu Institutu Politéknika Betanu iha 2022 ho orsamentu millaun $18,369.

Ministru Ensinu Superiór Siénsia no Kultura (MESSK), Longuinhos dos Santos, esplika katak konstrusaun edifísiu foun IPB ne’e sei lao tuir prosesu maske hetan ona autorizasaun presiza haree mekanizmu hotu molok to’o iha konstrusaun ne’e rasik.

Governate ne’e akresenta katak projetu instalasaun edifísiu IPB antes ne’e prevee ona ho valór ne’ebé konsta purvolta millaun $21,89, maibé Ministériu Ensinu Superiór hamutuk ho Ministériu Obras Públiku (MOP) halo fali revizaun konsege redusaun valór orsamentu refere tun ba millaun $18,369.

Ba jornalista sira iha Palásiu Governu, kuarta ne’e, Ministru Longuinhos dos Santos, klarifika katak, objetivu hosi projetu konstrusaun foun edifísiu Institutu Politéknika Betanu ne’e atu dezenvolve área edukasaun hodi prepara rekursu umanu ho kualidade iha área espesífiku produsaun animál no area konstrusaun sivíl.

“2022 ita sei halo konstrusaun ida ne’e ho fazeadamente orsamentu ne’ebé mak ita konsta iha 2022 nian maka millaun $4,5 hosi millaun $18,369,” nia esplika.

Prezidente IPB, Acácio Cardoso dehan projetu ne’e rasik nian na’in maka Governu, ne’ebé IPB sai hanesan benefisiáriu no projetu  instalasaun edifísiu IPB foun ne’e sei instala iha rai ektare 10 ne’ebé komunidade oferese bá Ministériu Edukasaun.

Otimista 2021 remata ezekusaun atinzi 89%

Ministru Ensinu Superiór Siénsia no Kultura (MESSK) Longuinhos dos Santos, otimista katak molok tinan 2021 remata ezekusaun orsamentu MESSK nian atinje 89%.

Nia  konsidera katak ezekusaun OJE 2021 ba MESSK rasik progresu di’ak tanba to’o ohin loron atinje ona 56,6%.

“Kuandu ita halo komparasaun bá ezekusaun ita tama iha faze normál tanba ita nia ezekusaun ne’e lao bazeia bá situasaun. Maibé ita nia predisaun ba ezekusaun kuartu trimestrál ita hakarak atinje to’o 89%”, Ministru Longuinhos  hateten.

Espetativa Ministériu nian tama fulan outubru hakarak ka la kohi ezekusaun tenke atinje 70% atu nune’e to’o fulan dezembru ,tinan rohan, bele kompleta 89%.

Jornalista : Tomé Amado

Editór       : Francisco Simões

HAKEREK NO HATÁN

Please enter your comment!
Please enter your name here