Juiz Administadór TDD, Afonso Carmona. Imajen Tatoli/Nelson de Sousa.

DILI, 14 setembru 2021 (TATOLI)—Tribunál Distritál Dili (TDD), sei hala’o julgamentu normál iha 16 setembru, 2021.

Durante fulan ida, hahú hosi 01 agostu to’o 15 setembru, Tribunál iha hela férias judisiál, nune’e atende de’it prosesu urjente, hanesan primeiru interrogatóriu, sumáriu, providénsia kautelár ho julgamentu kontinuasaun, hodi asegura prova labele lakon, no kria turnu ba juiz ho ofisiál justisa hodi atende prosesu urjente-sira.

Notísia relevante:TR oferese motorizada sia ba TDD

“Férias judisiál sei termina iha aban, tanba ne’e bainrua Tribunál sei atende fila-fali prosesu normál,’’Juiz Administadór TDD, Afonso Carmona, hateten ba jornalista Agência Tatoli, iha kna’ar fatin, Mandarin, tersa ne’e.

Durante fulan ida, atende prosesu urjente hamutuk 22, kompostu hosi krime 21 no sivíl ida.

TDD halo ona notifikasaun ba prosesu hotu, hodi marka audiénsia julgamentu iha loron tuir-mai bainhira férias judisiál termina.

Tuir dadus hosi TDD, hahú fulan janeiru to’o jullu tinan ne’e, rejista prosesu krime tama foun hamutuk 813, julgadu ka iha ona desizaun hamutuk 798, pendente ka aguarda julgamentu la’o hela  hamutuk 1.763 no prosesu sivíl iha entrada 147, julgadu 373 no pendente 790.

Tuir estatístika hosi númeru kazu krime maka violénsia doméstika, ho forma violasaun seksuál maustratu ba menór, ofensa koporais, arma branka, kondusaun sem karta, korrupsaun no seluk tan.

TDD daudaun iha kolokasaun juiz na’in-haat  foku ba kazu prosesu sivíl no na’in-sanulu atende kazu krime ho  konfinamentu domisiliáriu ne’ebé Governu termina ona, sei funsiona  mós julgamentu móvel kobre iha área jurisdisaun Dili rasik, munisípiu Ermera, Liquiça ho Aileu, hodi hakbesik justisa ba komunidade, liu-liu ba ema vunerável-sira laiha transporte atu to’o mai Dili ho kazu natureza violénsia doméstika no seluk tan.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here