Sekretáriu Estadu Igualdade no Inkluzaun (SEII), tersa (14/09) ne’e fó formasaun ba funsionáriu foun 36. Imajen/Midia SEII.

DILI, 14 setembru 2021 (TATOLI)—Sekretária Estadu Igualdade no Inkluzaun (SEII), tersa (14/09) ne’e fó formasaun ba funsionáriu foun 36 ne’ebé mak atu sai pontu fokál ba kada postu administrativu kona-bá atividade no lala’ok servisu SEII nian.

Sekretária Estadu Igualdade no Inkluzaun (SEII), Maria José da Fonseca Monteiro de Jesus ho pontu fokál hosi Postu Administrativu Soibada, Munisípiu Manatuto, Jesuina Marques Ricardo. Imajen Tatoli/Osória Marques.

“Ohin, ita realiza formasaun ida-ne’e hodi introdús atividade no programa SEII nian ba sira atu sira bele iha koordenasaun di’ak no hatene lala’ok servisu SEII nian, nune’e bainhira sira hala’o servisu iha terrenu ne’e bele implementa iha sira ida-idak bia postu administrative,” Maria José da Fonseca Monteiro de Jesus hateten ba Agência TATOLI, iha salaun Katedral, Vila Verde, Dili, tersa ne’e.

Hosi ema na’in-36 ne’e kompostu hosi feto 18 no mane 18 ne’ebé maihosi munisípiu 11 mak Aileu na’in-rua (2), Ainaro na’in-rua (2), Baucau na’in-lima (5), Bobonaro na’in-haat (4), Covalima na’in-lima (5), Dili na’in-rua (2), Liquica na’in-rua (2), Lautém na’in-tolu (3), Manatuto na’in-haat (4), Manufahi na’in-haat (4) no Viqueque na’in-haat (4).

Nia esplika, munisípiu Ermera no Postu Administrativu seluk iha munisípiu balun ne’ebé seidauk rekruta ne’e, sei halo rekrutamentu iha tinan 2022.

Tuir loloos, nia informa, SEII rekruta ema na’in-52 maibé orsamentu lato’o tanba hasai tiha osan balun hodi aloka ba programa cesta bázika nian, entaun SEII deside rekruta de’it ema 36 hosi kada postu administrativu sira.

Sira hirak ne’ebé tuir formasaun ne’e la inklui ho Rejiaun Administrativa Espesiál Oé-cusse Ambeno (RAEOA) no parte nasionál nian hamutuk na’in-ualu (8), ho intensaun atu hasa’e tan sira-nia kapasidade no koñesimentu iha área ne’ebé mak sira sei halo knaar ba.

Formasaun ne’ebé hala’o durante loron tolu nia-laran (kinta-sábadu, 14-16/09) ne’e, SEII aproveita sei lori parseiru sira hanesan Forum Komunikasaun ba Feto Timor Leste (FOKUPERS), Alola Fundation no seluk tán atu fahe informasaun ba funsionariu foun sira-ne’e.

“Ami hein katak formasaun durante loron tolu nia-laran ne’e bele hasa’e sira-nia koñesimentu kona-ba atividade no programa hirak ne’ebé mak SEII iha, atu nune’e sira bele halo servisu ho di’ak liután. Maibé klaru fatin foun ne’e presiza adapta. Ida-ne’e hanesan forsa foun atu aumenta postu traballu SEII nian,”  nia dehan.

Tanba, nia dehan, durante ne’e SEII nian funsionáriu ema ida de’it iha munisípiu ida entaun labele kobre servisu hotu-hotu ne’ebé SEII iha, tanba ne’e aumenta tán forsa foun ne’ebé sei halo servisu atividade SEII nia ho di’ak liután.

“Forsa foun ne’ebé sai pontu fokál iha kada postu administrativu ne’e, sei implementa programa oioin hosi SEII nian hanesan abordajén jéneru, empoderamentu ekonómiku, empoderamentu polítiku, prevensaun ba kombate violénsia sira,” nia dehan.

Entretantu pontu fokál hosi Postu Administrativu Soibada, Munisípiu Manatuto, Jesuina Marques Ricardo, hato’o agradesimentu tanba SEII fó fiar ba sira hodi bele manan iha rekrutamentu ida-ne’e, no ohin loron bele tuir formasaun kona-bá programa no atividade sira SEII nian.

“Formasaun ne’e sei aumenta tan ami-nia abilidade no koñesiementu kona-ba área ne’ebé mak ami atu servisu ba ne’e. Hein katak formasaun durante loron tolu ne’e sufisiente ona ba ami atu aprende no adapta lalaok instituisaun ne’e nian, hodi implementa iha ami-nia Postu Soibada nian,” Jesuina hateten.

Nia dehan, liuhosi formasaun ne’e SEII motiva no enkoraja feto maluk sira atu iha korajén hodi partisipa iha atividade saida de’it, liu-liu hakbiit no haforsa feto sira atu bele partisipa iha polítika no foti desizaun sira.

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here