Ministru Asuntu Parlamentár no Komunikasaun Sosiál, Francisco Jerónimo, asisti diretamentu prosesu vasina Covid-19 iha Suku Liurai, Aldeia Quirilelo, tersa (14/09). Imajen Tatoli/Francisco Sony

Aileu, 14 setembru 2021 (TATOLI)-Komunidade Aldeia Quirilelo, Suku Liurai, Postu Administrativu Aileu-Vila, Munisípiu Aileu, kontente ho prezensa Ministru Asuntu Parlamentár no Komunikasaun Sosiál (MAPKOMS), Francisco Martins Jerónimo, ne’ebé halo sensibiliza vasina nian ba komunidade Quirilelo, tersa ne’e.

MAPKOMS husu komunidade Quirilelo labele fiar boatu sira ne’ebé dehan ema ne’ebé simu vasina sei mate, ida ne’e informasaun ne’ebé laloos tanba laiha Governu ida hakarak oho nia povu rasik, maibé hakarak asegura nia povu hosi moras COVID-19, tanba ne’e koopera ho Governu simu vasina tanba vasina mak sai xave úniku hodi kontra COVID-19.

“Ami kontente tebes ho prezensa MAPKOMS nian iha ami-nia fatin hodi fó informasaun ne’ebé kle’an kona-ba vasina nian, tanba ami iha área rurál durante ne’e falta tebes informasaun loos, no lia falsu mak domina tebes ami entaun ami ta’uk tuir vasina, sé informasaun sira ne’e mak ami rona antes ami sei la dúvida ho vasina, maibé ohin Ministru to’o mai fó informasaun ne’ebé kredivel, ida ne’e mak ami buka duni durante ne’e no kontente tebes ami sei simu vasina,” reprezentante komunidade Domingas dos Santos hateten, bainhira hato’o agradesimentu ba prezensa MAPKOMS iha Aldeia Quirilelo.

Komunidade Manuel da Costa ne’ebé ohin, foin simu vasina hafoin rona informasaun direita hosi MAPKOMS kona-ba vantajen hosi vasina nian. Nia parte  kontente tebes tanba antes ne’e nia lakohi simu vasina tanba ho lia falsu ne’ebé mak espalla katak ema ne’ebé simu vasina sei mate sedu no sei hetan moras oioin.

“H a’u rasik rona informasaun diretamente hosi MAPKOMS, ha’u hatene ona objetivu hosi vasina ne’e la oho ita, maibé ajuda ita oinsá ita iha forsa atu hasoru COVID-19, ida ne’e ha’u kontente tebes, nune’e ohin tenke simu vasina nune’e salva ha’u nia aan, família, Aldeia, suku no ha’u-nia munisípiu,” nia dehan.

Nia dehan, ba oin nia rasik sei sai sasin ba nia maluk sira ne’ebé seidauk simu vasina katak simu vasina la oho, ema no nia rasik sei fahe informasaun vantajen hosi vasina nian ba família sira ne’ebé seidauk hatene didi’ak kona-ba vasina nune’e hotu-hotu simu vasina proteje aan hosi moras COVID-19.

Ministru Asuntu Parlamentár no Komunikasaun Sosiál Francisco Martins, husu ba komunidade hotu liuliu inan-aman sira ne’ebé daudaun ne’e sei iha dúvida nia laran lalika ta’uk, maibé tenke partisipa vasina nune’e bele aumenta imunidade hodi forsa hasoru COVID-19.

Nia hatutan, objetu hosi MAPKOMS halo sensibilizasaun vasina nian iha Aldeia Quirilelo ne’e tanba Governu iha obrigasaun to’o baze atu ajuda liña frente sira, hodi haforsa liután sira-nia servisu nune’e bele fó garantia katak komunidade bele partisipa vasina.

“Ha’u mai la’ós dehan vasina uluk mak sensibiliza ne’e lae, maibé vasina ne’e la’o nafatin no sensibilizasaun ne’e mós la’o hotu tanba durante ne’e partisipasaun komunidade la másimu, tanba ne’e membru iha obrigasaun tun ba terrenu halo esplikasaun ba komunidade nune’e sira mós foti desizaun ba sira-nia aan hodi simu vasina tanba durante ne’e sira ta’uk simu vasina tanba ho informasaun sira ne’ebé la loos,” nia dehan.

Kona-ba sensibilizasaun COVID-19 nian la’ós to’o ne’e de’it maibé ba oin kontinua nafatin to’o atinje meta ne’ebé Governu tau ona maizumenus to’o tinan ne’e nia rohan tenke atinje ona 80%.

Diretór Servisu Saúde Munisípiu Aileu, Julio dos Santos hateten, komunidade Aldeia Quirilelo ne’ebé sai alvu atu simu  mak hamutuk 1.976, tanba ne’e atu atinje alvu refere kada loron ekipa liña frente tenke fó vasina ba komunidade hamutuk 198.

“Ita espera liuhosi sensibilizasaun vasina nian diretamente hosi MAPKOMS bele ajuda komunidade ba oin hotu-hotu partisipa vasina,” nia dehan.

Jornalista   : Arminda Fonseca

Editór         : Francisco Simões

HAKEREK NO HATÁN

Please enter your comment!
Please enter your name here