Prezidente Komisaun B (Negósiu Estranjeiru, Defeza no Seguransa), José Agostinho Sequeira ‘Somotxo’, Imajen/Dok.Tatoli

DILI, 14 setembru 2021 (TATOLI)–Komisaun B ne’ebé trata asuntu Negósiu Estranjeiru, Defeza no Seguransa, husu órgaun soberania sira halo konsensu nasionál molok aplika militarizasaun iha fronteira entre Timor-Leste ho Repúblika Indonézia.

Prezidente Komisaun B, Deputadu José Agostinho Siqueira ‘Somotxo’ esplika, asuntu rua ne’ebé presiza halo análize kle’an mak krime organizadu ne’ebé kontinua buras iha fronteira no militarizasaun.

“Se ita iha ona kondisaun atubele kumpre militarizasaun, ha’u hanoin ita bele. Maibé dezde uluk kedas ha’u dehan tenke halo konsensu nasionál tanba polísia iha-ne’ebá mós liuhosi polítika konsensu nasionál. Tán ne‘e mak órgaun soberania sira sei halo desizaun tanba seguransa defeza externa ne’e iha Konstituisaun RDTL entre ba forsa armada, la’ós forsa seguransa interna,” Prezidente Komisaun B ne’e informa jornalista sira iha uma fukun, tersa ne’e.

Bainhira Governu sente iha ona kondisaun entaun molok halo tranzisaun tenke iha konsensu nune’e evita konfrontu polítiku no laiha nesesidade atu kondena malu iha futuru.

Tanba, estadu ida-ne’e iha órgaun soberania haat kompostu hosi Prezidente Repúblika, Parlamentu Nasionál, Governu no Tribunál Rekursu.

Nia subliña, kuandu laiha konsensu ba asuntu ne’e entaun ba futuru ema balu bele polítika situasaun ne’e.

Prezidente Komisaun B ko’alia asuntu ne’e tanba Primeiru-Ministru Taur Matan Ruak, fó-sai iha plenária katak sei destaka forsa armada iha fronteira.

Tuir Konstituisaun RDTL, Parte V (Defeza no Seguransa Nasaun nian), artigu 146 (Forsa Armada sira), númeru 2 hateten FALINTIL-FDTL garante independénsia nasionál, integridade territoriál, Liberdade no populasaun nia seguransa hasoru agresaun ruma ka ameasa externa, ho respeitu ba orden konstitusionál.

Purtantu artigu 147 (Polísia no forsa seguransa sira) númeru 1 esplika, Polísia sei defende legalidade demokrátiku no garante sidadaun sira-nia seguransa internu, maibé sira labele iha partidu polítiku.

Jornalista : Evaristo Soares Martins

Editór       : Cancio Ximenes

1 KOMENTÁRIU

  1. Buat ida Forsas Armada no Polisia nia deferensia nee iha farda deit,mais seluk nee hanesan deit Forsas F-FDTL mos ema no PNTL mos ema,ita bele dehan mesak Timor oan hotu deit maka ejerse iha instituisaun rua nee.so ema lahalo servisu maka lahalo sala,mais wainhira hasoru ona servisu iha terenu sempre hasoru difikuldadi oi-oin,nesesidade familia uma laran,hasoru inimigu,hasoru amigo buat hirak nee tengki iha hotu treinamentu kada ema ida- ida tengki hatene no hetan wainhira halao servisu Nasaun nian.ita hotu hakarak instituisaun rua nee tengki servisu ho profesionalismu katak tempu servisu tengki kumpri dever tomak labele apoia familia,labele apoia aliran,labele hadau fali servisu instituisaun seluk nian nebe maka Nasaun no povu tau fiar ba,servisu kahur tun sae hare sabraut no bele hamenus professionalismo.
    Relasiona ho politika guvernu nian hakarak troka PNTL ba F-FDTL iha Fronteira husu guvernu atu tetu didiak lai, keta halo iha futuru arepende no bele mos deskrobre fali Frakeja instituisaun rua nee nian tamba buat ida iha Fronteiras nee laos hasoru Manobra Politik rai laran deit maibe hasoru mos manobra politik husi rai liur ou bele dehan troka PNTL tau F-FDTL ne hanesan hasai Tigri no troka fali Lafaek alias rua nee hanesan deit tamba nee maka husu guvernu atu hadia uluk mentalidade ema nian Liu -liu instituisaun PNTL,ou halo Rotasaun ou transferensia servisu iha intern PNTL .ita mos iha mehi hakarak ita nia fronteiras nee hanesan lalehan kiik ida mai ita nebe hafutar aifunan buras matak no malirin ba maun alin Timor osidental no Timor Leste.

HAKEREK NO HATÁN

Please enter your comment!
Please enter your name here