Kompañia telekomunikasaun Telkomcel hosi Indonézia, oferese ambulánsia ida ba Ministériu Saúde (MS), iha edifísiu MS Caicoli, segunda (13/09/21). Imajen Tatoli.

DILI, 13 setembru 2021 (TATOLI)—Kompañia telekomunikasaun Telkomcel  hosi Indonézia, oferese ambulánsia ida ba Ministériu Saúde (MS).

Oferesimentu ne’e hanesan asaun karidade liu hosi servisu Corporate Social Responsibility (CSR) ho programa ‘TelkomcelCare’ hodi komemora ezisténsia kompañia ne’e iha Timor-Leste ba dala-sia iha 17 setembru tinan 2021.

Notísia relevante:MS oferese ambulánsia haat ba Munisípiu Covalima

“Ambulánsia ne’e tuir padraun internasionál ho rekezitu espesífiku hosi Ministériu Saúde Timor-Leste, espera fasilidade ida ne’e bele ajuda no suporta di’ak liu tan prosesu atendimentu pasiente COVID-19 iha nasaun ne’e,” CEO Telkomcel, Yogi Rizian Bahar, hateten iha edifísiu MS, segunda ne’e.

Yogi Rizian Bahar, hateten Telkomcel hanesan parseiru dezenvolvimentu ba nasaun RDTL, sei iha komitmentu nafatin atu apoia Governu Timor-Leste, liu hosi Ministériu Saúde
Timor-Leste, nune’e bele ajuda no suporta di’ak liu tán serbisu MS.

Apoiu ambulánsia ne’e, hanesan kontinuasaun hosi programa Corporate Social Resposibility (CSR) kompania Telkomcel-nian ne’ebé koñesidu ho naran ‘TelkomcelCare’ hosi etapa primeiru iha fulan fevereiru 2021, Telkomcel oferese mákina ventiladór atu ajuda prosesu respiratóriu, iha fulan juñu tinan 2021.

Serimónia entrega ambulánsia ne’e hala’o iha edifísiu MS hosi Chief Executive Officer (CEO) Telkomcel, Yogi Rizkian Bahar no simu hosi Ministra Saúde, Odete Maria Freitas Belo.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here