Diretór Ezekutivu FONGTIL, Daniel Santos do Carmo. Imajen Tatoli/Egas Cristovão

DILI, 13 setembru 2021 (TATOLI)—Diretór Ezekutivu Forum Organizasaun Naun Govermentál Timor-Leste (FONGTIL), Daniel Santos do Carmo hateten, tuir rezulatdu monitorizasaun hatudu katak tasa partisipasaun vasinasaun iha Timor-Leste ne’e, Munisípiu Viqueque mak aas liu no atinje ona 52% duke munisípiu sira seluk.

Nia hateten, munisípiu sira seluk ne’ebé tasa partisipasaun aas uitian mak mak Aileu, Covalima, Dili, Liquiça no Lautem, no iha munisípiu seluk iha semana ne’e partisipasaun kiik liu kompara ho semana kotuk nian.

“Númeru vasina ba doze daruak nian barak liu no ida-ne’e akontese iha munisípiu Aileu, Covalima, Dili, Liquiça no Lautem, kompara ho sira-ne’ebé simu ona vasina doze dahuluk nian. Maibé Viqueque kontinua sa’e makaas tanba to’o agota atinje ona 52%. Persentajen ne’e bazea ba rezultadu monitorizasaun ne’ebé NG lokál sra hala’o iha loron 6-9 setembru iha fatin vasinasaun 24 ha munisípiu 10 mak deskobre komunidade hamutuk 4.546 mak partispa ona iha vasinasaun ne’e,” Diretór FONGTIL aprezenta rezulatdu monitorizasaun kona-ba vasina iha Timor-Leste iha salaun FONGTIL, Caicoli, Dili, segunda ne’e.

Husi aprezentasaun ne’e dadus jerál kada fatin vasinasaun hatudu katak, sentru saúde Uailili-Baucau mak persentajen ki’ik liu kompara ho fatin monitorizasaun 23 sira seluk, maibé hosi rekomendasaun sira-ne’ebé rekolla hosi ONG AUFD hatudu katak partisipasaun komunidade mak laiha entaun atividade vasinasaun mós la la’o.

“Iha sentru saúde Uailili iha suku Uailili-Baucau labele fó atendimentu vasinasaun ba komunidade tanba komunidade la partisipa,” nia dehan.

Monitorizasaun ne’ebé mak hala’o hosi Rádiu Komunidade Tokodede (RKT) iha Postu Maubara no Fundasaun Haburas Moris (FHM) iha Ritabou, Bobonaro ne’e hatudu iha resposta no progresu pozitivu.

“Vasinasaun balun ninia dezempeñu di’ak tebes. Ezemplu, hosi rezultadu monitorizasaun ne’ebé hala’o ba sentru vasinasaun 24 iha munisípiu 10 iha semana ne’e, hosi loron 06-09 setembru 2021 hatudu katak iha progresu pozitivu,” nia dehan.

Iha sentru saúde Railaco-Ermera, atendementu iha fatin ne’e la’o natatin maibé partisipasaun komunidade menus tanba de’it informasaun ne’ebé mak espalla katak maske simu vasina kompleta ona mós sei la halo movimentasaun livre ne’e mak halo komunidade la partisipa.

Iha postu saúde Iliheu-Manatuto, nia dehan, xefe suku informa katak povu barak mak simu ona vasina tanba ekipa saúde sira tun direta hodi halo vasinasaun, maibė problema mak bee hodi fase liman mak laiha nomós laiha asesibilidade hanesan iha Vera Crus ne’e.

Atu promove partisipasaun komunidade ne’e presiza kompromisu hodi pesoál saúde no líder komunitaria sira halo kolaborasaun ho igreja hodi asegura tasa partisipasaun bele aumenta, no bele asegura prevensaun COVID-19 ne’ebé efetivu.

Hosi fatin monitorizasaun 24 ne’e, ONG Resource and Training Center Aileu Resource hala’o monitorizasaun vasainasaun iha Sede Suku Manucassa no Sede Suku Namolesso, ONG Juventude Inovativu (J1) halo monitorizasaun iha Klinika Maternidade Fatumeta no Aliansa Nasional Controlo Tabaco-Timor-Leste iha Sentru Saúde Vera Cruz no SAMES.

ONG AUFUD monitoriza iha Sentru Saúde Riamari Baucau, Sentru Saúde Uailili no Sentru Saude Bucoli, ONG Knua Haberan Comunidade (KHC) halo monitorizasaun iha Postu Saúde Uma Quic iha Suku Uma Quic, Postu Saúde Lugasa iha Suku Uma Uain Leten no iha Sentru Saúde Caraubalu iha Suku Caraubalu.

ONG Knua Haberan Comunidade (KHC) mós halo monitorizasaun iha Postu Saúde HP Afaloicai Antigu iha Suku Afaloicai no Aldeia Buibela, KHC halo monitorizasaun ba vasinasaun iha Postu Saúde Crarás iha Suku Uma Quic, iha Postu Saúde Fatudere iha Suku Fatudere.

ONG IMI halo monitorizasaun iha Sentru Saúde Letefoho, ONG HDI halo monitorizasaun iha Sentru Saúde Railaco. Fundasaun Haburas Moris halo monitorizasaun iha Sentru Saúde Cailaco iha Suku Miligu, iha Postu Saúde Ritabou iha Suku Ritabou no iha Sentru Saúde Balibo Villa.

Asosiasaun Moris Foun halo monitorizasaun iha Postu Saúde iha Suco lliheu (Manatuto), iha Sentru Saúde Manatuto Vila no Radio Komunidade Tokodede halo monitorizasaun iha Sentru Saúde Maubara (Liquiça).

ONG FUNERO halo monitorizasaun ba vasinasaun ne’e iha Sentru Saúde Lospalos iha suku Fuiloro, ONG AHFTL halo monitorizasaun iha Sebtru Saúde Iliomar no Sentru Komunidade Covalima halo monitorizasaun ba vasinasauun iha klinika Suai Vila iha Suku Debos.

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here