Diretora Nasionál Instituto Nasionál Dezenvolvimentu Mão de obra (INDMO), Isabel Fernandes de Lima. Imagén TATOLI/Antónia Gusmão.

DILI, 13 setembru 2021 (TATOLI)—Diretora Nasionál Institutu Nasionál Dezenvolvimentu Mão de Obra (INDMO), Isabel Fernandes de Lima, informa iha trimestre dahuluk no daruak nian ne’e INDMO ezekuta ona Orsamentu Jerál Estadu (OJE) 2021 hamutuk 33.45%.

“Orsamentu ne’ebé aloka mai iha INDMO hamutuk $650.060. Ida-ne’e orsamentu ne’ebé mak fó mai INDMO ba tinan 2021 nian, ne’ebé nia ezekusaun hosi janeiru to’o agostu hamutuk 33.45%. Orsamentu ida-ne’e ami fahe ba saláriu vensimentu, bens servisu no kapitál menór,” Isabel Fernandes de Lima hateten ba Agência Tatoli, iha nia kna’arfatin, segunda ne’e.

Orsamentu Jerál Estadu (OJE) 2021 ne’ebé aloka ba INDMO hamutuk $650.060 ne’e, fahe ba saláriu vensimentu ho totál $128.436 ne’e ezekuta ona 26.06%, bens servisu ho totál $488.124 ne’e ezekuta ona 32.56% no kapitál menór ho totál $32.500 ne’e ezekuta ona 74.63%.

“Razaun, aminia ezekusaun sei kiik, tanba horbainhira ami mós rekruta AAP (Ajente Administrasaun Públika) sira, aminia orsamentu propoin atu komesa janeiru maibé kestaun tékniku balun no kontratadu sira-ne’e iha fulan-jullu mak sira foin bele tama. Entaun, prosesu ida-ne’ebé naruk mós,” nia dehan.

Orsamentu ida-ne’e mós bo’ot ne’e sei iha kompetisaun Aptidaun Nasionál, ne’ebé tinantinan, INDMO halo kompetisaun no seluk mós tanba serka sanitária entaun INDMO labele halo.

“Ezemplu, monitórizaun avaliasaun, ita bele check iha virtuál no telefóne de’it sira, maibé atu ba diretamente labele. Tanba ita tau osan ba sirania viajén, aluga mós kareta, buat sira-ne’e ita labele halo. Entaun ida-ne’e mós implika, tanba ita labele halo fízika ba avaliasaun no monotorizasaun ida-ne’e no viajén mós ita la konsega,” nia esplika.

Alende ne’e, INDMO mós iha kontrata konsultór sira hodi halo revizaun ba kúrrikulu sira-ne’ebé mak iha ne’ebé INDMO bele halo pagamentu ne’e iha fulan-outubru, tanba oras-ne’e sira sei servisu hela entaun outubru mak selu.

“Seluk tan, ami mós halo hela rekrutamentu ba kazuais balun ne’ebé oras ne’e daudaun sira entrevista hela. Seluk mak sistema finansa ne’e mós ita labele dehan katak seidauk selu ne’e labele foti osan. Ida-ne’e ma kami enfrenta. Ami mós sosa karreta ida maibé kareta ne’e seidauk to’o iha ne’e. Kuandu to’o iha ne’e, ami halo pagamentu finál,” nia informa.

Ezekusaun ida-ne’e mak INDMO halo entaun foin mak foin atinje 33.45%, maibé to’o fulan-novembru konserteza INDMO nia gráfiku ezekusaun ne’e sei boot, tanba atividade boot sei akontese iha fulan-novembru nia laran tanba kompetisaun ne’e.

Jornalista : Nelia Fernandes

Editór       : Cancio Ximenes

HAKEREK NO HATÁN

Please enter your comment!
Please enter your name here