Komunidade iha suku Comoro, kapitál Dili, troka voucher iha supermerkadu Leader ho produtu Cesta Bázika, kinta (10/12). Imajen TATOLI/António Gonçalves

DILI, 11 setembru 2021 (TATOLI)—Governu konklui ona ezekusaun pagamentu ba medida sosio-ekonómiku rua hanesan Moratória Kréditu no Cesta Bázika ho totál ezekusaun 100%, hosi totál medida neen.

Iha maiu 2021, Prezidente Repúblika promulga ona Lei Orsamentu Jerál Estadu (OJE) 2021 Retifikativu, ne’ebé lori mudansa iha dotasaun orsamentál lubun ida inklui dotasaun Fundu COVID-19, ne’ebé ho montante inísiu millaun $31, hetan aumentu millaun $256,6 nune’e ninia totál millaun $287,6.

Mudansa iha dotasaun Fundu Espesiál COVID-19 ne’e, fó biban ba Governu hodi finansia medida sosio-ekonómiku neen hanesan Apoiu ba empregu, Moratória Kréditu, Izensaun Pagamentu Propina no Subsídiu Internet ba Estudante Ensinu Superiór, Sosa Produtu Alimentár hosi Produtór Lokál, Apoiu Traballadór Liña Frente, Medida Mitigasaun no Prevensaun COVID-19 inklui Finansiamentu Operasaun Sentru Integradu Jestaun Krize (CIGC,sigla portugés).

Tuir nota ne’ebé Agência TATOLI asesu iha sábadu ne’e, ezekusaun Moratória kréditu atinje ona 100%, ne’ebé iha fulan-jullu 2021, Ministériu Finansa halo ona transferénsia millaun $2 ba Banku Sentrál Timor-Leste hodi ezekuta programa ne’e.

Enkuantu, pagamentu ba kompañia fornesedór lokál Cesta Básica 188 konklui ona ho montante millaun $63,5.

Aleinde ne’e, kompañia fornesedór sira kumpre ona devér hodi selu impostu rendimentu 0,5% hosi totál pagamentu ba Autoridade Tributária, Ministériu Finansa ho totál kontribuisaun impostu hamutuk rihun $317,5.

Inisiativa kompaña lokál kumpre devér ne’e, fó mós kontribuisaun ba iha taxa ezekusaun Governu liuliu iha parte ezekusaun reseita doméstika ne’ebé to’o iha 31 agostu 2021 atinji ona millaun $96,6 ka 52% hosi totál estimativa reseita millaun $187,1.

Bazeia ba relatóriu Ministériu Koordenadór Asuntu Ekonómiku (MKAE), to’o iha fulan-agostu, benefisíariu sira-ne’ebé mak simu ona Cesta Básikaa hamutuk ema millaun 1,4 resin ka 98% hosi totál benefisíariu hamutuk ema millaun 1,5.

Ba oin, distribuisaun Cesta Básikaa ba reklamante rihun 25resin iha territóriu nasionál, ne’ebé sei realiza iha fulan-setembru nia laran bazeia ba kalendáriu hosi MKAE.

𝐀𝐩𝐨𝐢𝐮 𝐛𝐚 e𝐦𝐩𝐫𝐞𝐠𝐚𝐝ór 𝐧𝐨 t𝐫𝐚𝐛𝐚𝐥𝐥𝐚𝐝ó𝐫 ezekuta ona millaun $4,9

Governu aloka millaun $45 hodi apoiu ba entidade empregadór no traballadór sira-ne’ebé mak afetadu hosi pandemia COVID-19, ho kondisaun rejista ona iha Institutu Nasionál Seguransa Sosiál (INSS).

Nune’e, fulan-jullu, Ministériu Finansa halo ona transferénsia ba konta bánkaria INSS ho montante millaun $22,7 no ezekuta ona millaun $4,9 ho nia detalla ezekusaun hanesan apoiu ba entidade empregadór hamutuk 1.493 ho totál pagamentu millaun $2,6, subsídiu eletrisidade ba empregadór hamutuk 273 ho totál pagamentu rihun $378, subsídiu renda ba kompañia hamutuk 181 ho totál pagamentu rihun $176.

Une’e mós, dispensa kontributiva ba Estadu Emerjénsia ba ema hamutuk 294 ho totál pagamentu rihun $274, dispensa kontributiva fakultativu ba ema hamutuk 1.377 ho totál pagamentu rihun $29, fakultativu ba ema hamutuk 1.377 ho totál pagamentu rihun $252 no apoiu subsídiu ba traballadór hamutuk 7.894 ho totál pagamentu millaun $1,3.

𝐀𝐩𝐨𝐢𝐮 𝐈𝐳𝐞𝐧𝐬𝐚𝐮𝐧 𝐏𝐫𝐨𝐩𝐢𝐧𝐚 𝐛𝐚 𝐄𝐬𝐭𝐮𝐝𝐚𝐧𝐭𝐞 𝐄𝐧𝐬𝐢𝐧𝐮 𝐒𝐮𝐩𝐞𝐫𝐢ór 𝐡𝐚𝐦𝐮𝐭𝐮𝐤 𝟔𝟒.𝟔𝟏𝟗

Iha jullu 2021, Ministériu Finansa realiza ona pagamentu izensaun propina ba estudante Ensinu Superiór hamutuk 18 ho montante millaun $5,6, ba totál estudante benefisiáriu hamutuk 64.619

Nune’e, instituisaun Ensinu Superiór públiku no privadu hamutu 18 mak hanesan Dili Institute of Technology (DIT), East Timor Coffee Institute (ETCI), Institute of Business (IOB), Instituto Boaventura Timor-Leste (IBTL), Instituto Católico Formação de Professores (ICFP), Instituto Ciências da Saúde (ICS), Instituto de Ciências Religiosas (ICR), Instituto Filosófico S. Francisco de Sales (IFFS).

Nune’e mós, Instituto Politécnico de Betano (IPB), Instituto Profissional de Canossa (IPDC), Instituto S. João de Brito (ISJB), Instituto Superior Cristal (ISC), Instituto Superior de Filosofia e Teologia (ISFIT), João Saldanha Institute (JSI), Universidade de Díli (UNDIL), Universidade da Paz (UNPAZ); Universidade Nacional de Timor Lorosa’e (UNTL), no ikus liu mak Universidade Oriental Timor Lorosa’e (UNITAL).

𝐒𝐮𝐛𝐬í𝐝𝐢𝐮 𝐈𝐧𝐭𝐞𝐫𝐧𝐞𝐭 𝐧𝐨 𝐏𝐮𝐥𝐬𝐚 𝐛𝐚 𝐄𝐬𝐭𝐮𝐝𝐚𝐧𝐭𝐞 𝐄𝐧𝐬𝐢𝐧𝐮 𝐒𝐮𝐩𝐞𝐫𝐢ó𝐫

Relasiona ho subsídiu internet no pulsa ba estudante ensinu superiór sira, ho orsamentu alokadu millaun $2, Ministériu Ensinu Superiór Siensia no Kultura (MESSK) sei kompleta rekezitu ba Operadór Telekomunikasaun sira (Timor Telecom, Telemor no Telkomcel) hodi submete filafali ba Ministériu Finansa atu verifika molok realiza pagamentu.

𝐅𝐢𝐧𝐚𝐧𝐬𝐢𝐚𝐦𝐞𝐧𝐭𝐮 𝐒𝐮𝐩𝐥𝐞𝐦𝐞𝐧𝐭𝐮 𝐑𝐞𝐦𝐮𝐧𝐞𝐫𝐚𝐭ó𝐫𝐢𝐮 𝐛𝐚 𝐓𝐫𝐚𝐛𝐚𝐥𝐥𝐚𝐝ó𝐫 𝐥𝐢ñ𝐚 𝐟𝐫𝐞𝐧𝐭𝐞

To’o iha 11 setembru 2021, Sekretariadu Tékniku Fundu COVID-19, Ministériu Finansa foin mak simu pedidu pagamentu hosi Ministériu Interiór (MI) no Ministériu Administrasaun Estatál (MAE).

Hafoin verifika, Sekretariadu Tékniku tenke devolve filafali pedidu pagamentu refere tanba la-prienxe rekezitu pagamentu konforme Dekretu Lei nú 13/2021, 24 agostu kona-ba finansiamentu suplementu remuneratóriu ba traballadór liña frente sira.

Ministériu FInansa mós halo ona kontaktu ba Ministériu Saúde  no CIGC atu submete pedidu pagamentu, ne’ebé parte rua konfirma sei submete pedidu pagamentu iha tempu badak nia-laran hodi verifika molok realiza pagamentu.

Jornalista : Osória Marques

Editora      : Julia Chatarina

HAKEREK NO HATÁN

Please enter your comment!
Please enter your name here