Prezidente FFTL, Francisco Martins da Costa Pereira Jerónimo. Imajen TATOLI/Egas Cristóvão.

AILEU, 10 setembru 2021 (TATOLI)–Munisípiu Aileu aprezenta rezultadu vasinasaun nível munisipál ba Ministru ba Asuntu Parlamentár no Komunikasaun Sosiál (MAPKOMS), Francisco Jerónimo maibé persentajen vasinasaun hosi Aileu nian kiik-liu kompara ho munisípiu sira seluk.

Ministru ba Asuntu Parlamentár no Komunikasaun, Fracisco Jerónimo, husu ekipa saúde sira tenke kontinua serbisu maka’as liután tanba komunidade barak mak seidauk simu vasina.

“Iha Aileu ne’e ema-ne’ebé simu vasina ne’e persentajen kiik-liu. Hahú ohin ba oin, espera bele alkansa meta ne’ebé iha tanba vasina ne’e atu haforsa imunidade. Ekipa saúde tenke serbisu hamutuk ho autoridade lokál sira, nune’e konvense komunidade hodi bele simu vasina,” Ministru Francisco Jerónimo, ko’alia iha abertura ba kampaña 10 dias, iha Aileu, sesta ne’e.

 Nia dehan, oras ne’e iha Dili konfinamentu loke ona maibé bainhira hala’o viajen tenke kumpri protokolu hanesan uza maskára, fase-liman beibeik ho sabaun no kontinua prátika distansiamentu sosiál.

Governante ne’e informa ba autoridade lokál sira iha munisípiu Aileu katak, VIII Governu Konstitusionál hakarak povu hotu tenke simu vasina.

Iha fatin hanesan, Diretora Jerál Prestasaun Servisu, Odete Viegas, konsidera persentajen 27% ne’e kiik-liu, tanba ne’e tenke kontinua serbisu maka’as.

“Atinjimentu hosi vasina ne’ebé ita implementa hosi fulan-abríl to’o agora, munisípiu Aileu mak númeru kiik-liu. Tanba saida mak Aileu labele hanesan ho munisípiu sira seluk. Aileu to’o ohin loron persentajen ba iha primeira doze foin mak 27%, segunda doze foin mak 14%. Munisípiu ne’ebé persentajen hanesan ho Aileu mak Ainaro no Ermera. Munisípiu sira seluk 30% ba leten ona,” nia dehan.

Iha kampaña vasinasaun COVID-19 iha munisípiu Aileu ne’e marka prezensa hosi MAPKOMS, Francisco Jerónimo, Diretora Jerál Prestasaun Servisu Odete Viegas, Sekretáriu Administrasaun Munisípiu Aileu Felix Oliveira no ekipa saúde Aileu.

Nune’e mós administradór postu administrativu sira no xefe suku sira iha territóriu Aileu nian mós marka prezensa iha aprezentasaun rezultadu implementasaun COVID-19 nível nasonál, aprezentasaun rezultadu vasinasaun nível munisípiu Aileu hahú hosi abríl to’o 7 setembru 2021 no aprezentasaun planu mikro ba implementasaun kampaña loron 10 (10 dias) kona-ba vasinasaun ne’e hahú hosi 10 setembru to’o 22 setembru.

Alvu hosi Ministériu Saúde nian mak ema 31.235 tenke simu vasina tuir polítika Governu nian hasoru progagasaun surtu COVID-19 maibé ema-ne’ebé vasina ona hamutuk (vasinadu) 12.808 kompostu doze dahuluk 8.407 (27%) no doze daruak 4.401 (14%).

Jornalista : Evaristo Soares Martins

Editór   : Cancio Ximenes

HAKEREK NO HATÁN

Please enter your comment!
Please enter your name here