Komunidade iha suku Comoro, kapitál Dili, troka voucher iha supermerkadu Leader ho produtu Cesta Bázika, kinta (10/12). Imajen TATOLI/António Gonçalves

DILI, 10 setembru 2021 (TATOLI)Ministériu Finansa (MF) to’o loron 09 setembru 2021, konklui ona pagamentu Cesta Bázika ho montante millaun $63,5 ba kompañia fornesedór hamutuk 188.

Tuir nota ne’ebé Agência TATOLI asesu iha sesta ne’e, pagamentu hirak ne’e realiza hafoin Sekretariadu Tékniku Fundu COVID-19 hosi MF simu pedidu pagamentu hosi Ministériu Turizmu, Komérsiu no Indústria (MTKI) hamutuk millaun $29,5 ba kompañia lokál 72, Sekretaria Estadu Kooperativa (SEKoop) ho valór millaun $20,2 ba kompañia 24, Sentru Lojístika Nasionál (CLN) ho valór millaun $8,4 ba kompañai 61 no Ministériu Agrikultura no Peska (MAP) ho valór millaun $5,2 ba kompañia lokál hamutuk 31.

Aleinde ne’e, kompañia fornesedór hirak ne’e kumpre ona devér hodi selu impostu rendimentu 0,5% hosi totál pagamentu ba Autoridade Tributária MF, ho totál kontribuisaun impostu hamutuk $317.000.

“Inisiativa kompañia lokál kumpre sira-nia devér atu fó kontribuisaun ba taxa ezekusaun Governu, liuliu iha parte ezekusaun reseita doméstika ne’ebé to’o iha 31 agostu 2021 atinje ona millaun $96,6 ka 52% hosi totál estimativa reseita millaun $187,1,” nota MF esplika.

Bazeia ba relatóriu hosi Ministériu Koordenadór Asuntu Ekonómiku (MKAE), to’o iha fulan-agostu 2021, benefisíariu sira ne’ebé simu ona Cesta Bázika hamutuk ema millaun 1,4 resin ka 98% hosi totál benefisíariu hamutuk ema millaun 1,5 resin iha suku 452 iha territóriu tomak.

Ba oin, sei halo distribuisaun Cesta Bázika ba reklamante 25.000 resin iha territóriu nasionál no sei la’o tuir kalendáriu ne’ebé estabelese hosi MKAE hamutuk ho ministériu implementadór sira.

Notísia relevante: Posibilidade MTKI distribui Cesta Bázika ba reklamate iha setembru

MF husu ba kompañia fornesedór, molok realiza pagamentu, tenke nafatin kumpre devér hodi selu simpostu rendimentu 0,5% hosi totál rendimentu konforme Lei Tributária haruka.

Nune’e, kompañia sira tenke aprezenta resibu pagamentu impostu rendimentu ba Sekretariadu Tékniku Fundu COVID-19 atu nune’e bele realiza pagamentu.

Karik kompañia fornesedór sira iha pergunta ka presiza informasaun liután kona-ba asuntu impostu, bele kontaktu Autoridade Tributária (AT) ka vizita portál AT https://attl.gov.tl/ atu hetan informasaun kona-ba pagamentu impostu, submisaun relatóriu mensál ka anuál no pedidu emisaun ba sertidaun dívida.

Pagamentu impostu bele halo liuhosi mákina ATM P24, ne’ebé kontribuinte sira la presiza ba forma tan iha banku komersiál sira hanesan uluk.

Governu liuhosi ministériu implementadór sira kontrata kompañia hamutuk 232 atu fornese  Cesta Bázika ba populasaun tomak iha territóriu ho kustu implementasaun programa hamutuk millaun $82.

Ministériu implementadór Cesta Bázika hanesan MTKI responsável ba suku 118 ho benefisiáriu 658.608, MAP kobre iha suku 47 ho nia benefisiáriu 106.782, SEKoop kobre iha suku 183 ho benefisiáriu 434.055, Sentru Lojístika Nasionál (CLN, sigla portugés) kobre suku 86 ho nia benefisiáriu hamutuk 215.875, no Rejiaun Adminitrativu Espesiál Oé-cusse Ambeno (RAEOA) kobre iha suku 18 ho benefisiáriu 84,243.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here