Kooedenadór Advokasia FONGTIL, Ivo Colimau Lay Costa. Imajen Tatoli/Francisco Sony

DILI, 10 setembru 2021 (TATOLI)-Forum Organizasaun Naun Governamentál Timor-Leste (FONGTIL) husu Governu liuhosi Konsellu Estadu Defeza no Seguransa, Parlamentu Nasionál, Ministru Defeza Ministru Interiór no Konsellu Ministru halo re-konfigurasaun ba setór seguransa iha liña fronteira terrestre.

Koordenadór Advokasia FONGTIL, Ivo Colimau Lay Costa, hateten FONGTIL husu Governu halo re-konfigurasaun ba seguransa iha liña fronteira terrestre tanba relasiona akontese pasajen ilegál ne’ebé akontese hosi timor-oan na’in-500 resin ne’ebé liuhosi fronteira terrestre iha fulan agostu 2021 nia-laran.

Iha fulan setembru 2021 deteta sidadaun timor-oan ida hodi hatama arma ilegál (presaun de ár) ho nia marka AESE 92 tama territóriu Timor-Leste, hosi ne’e hatudu katak UPF menus kapasidade hodi halo knaar no asegura setór seguransa iha liña frente.

Nia dehan, maske arma ilegál refere kilat manu, la oho ema, maibé kilat refere bainhira utiliza hakanek ema de’it mós krime, no kilat refere fó impaktu ba seguransa ambientál (fauna) protejidu iha artigu 20 númeru 1 hosi lei númeru 5/2017 19 abríl konsidera kilat manu mós hanesan arma branka ne’ebé ninia sirkulasaun lei bandu.

“Ami rekomenda ba Governu halo re-konfigurasaun ba setór seguransa iha liña fronteira terrestre, hanesan substitui Unidade Patrullamentu Fronteira (UPF) ho FALINTIL-Forsa Defeza Timor-Leste (F-FDTL) tuir orientasaun hosi Konstituisaun Repúblika Demokrátika Timor-Leste abrigu ba artigu 146,” Ivo Colimau Lay Costa, hateten liuhosi konferénsia imprensa iha salaun FONGTIL, Caicoli, Dili, sesta ne’e.

Artigu 146 ne’e ko’alia kona-ba defeza seguransa nasionál, entaun atu substitui UPF F-FDTL ne’e tanba daudaun ne’e UPF mak hala’o servisu iha liña fronteira terrestre atu asegura fronteira. Ida-ne’e, FONGTIL haree la tuir orientasaun hosi Konstituisaun RDTL artigu 146 tanba iha artigu 146 númeru 2 hateten F-FDTL garante independénsia nasionál, integridade territorial, liberdade no populasaun nia seguransa hasoru agresaun ruma ka ameasa externa, ho respeitu ba orden Konstitusionál.

“Signifika katak únika forma atu asegura integridade territoriál iha liña fronteira hanesan aero, tasi, no terrestre ne’e kompeténsia F-FDTL, tanba ne’e presiza halo re-konfigurasaun reforma setór seguransa muda fali UPF mai fali liña daruak no F-FDTL ba fali liña dahuluk,” Ivo Colimau Lay Costa hateten.

Rekomendasaun seluk mak, atu prevene konflitu interese hodi asegura liña fronteira FONGTIL husu Governu konverte UPF ba fali Unidade Polísia Floresta (UPF) ne’ebé tau matan ba movimentu iha ai-laran tuan hodi prevene grupu krime organizadu hala’o sira-nia atividade krime iha ai-laran hanesan, estabelese kuartél ka konstrui plantasaun hodi kuda ai-horis proibidu tuir lei, marawana no opium.

Jornalista   : Arminda Fonseca

Editór         : Francisco Simões

HAKEREK NO HATÁN

Please enter your comment!
Please enter your name here