Adjuntu Diretór Eskola Ensinu Sekundáriu númeru 02 Villa nova Baucau, Titos Almeida. Imajen TATOLI/Natalino Belo

BAUCAU, 10 setembru 2021 (TATOLI)–Adjuntu Diretór Eskola Ensinu Sekundariu númeru 02 Villa nova, Baucau, Titos Almeida, hateten, parte eskola nafatin hein orientasaun hosi Ministeiru Edukasaun Juventude no Desportu (MEJD) atu fó sai kalándariu ezame períodu daruak.

“Ita hein de’it, karik sira fó informasaun mai parte diretiva, ita sei hatutan ba estudante sira liuhosi rede sosiál atu tuir ezame períodu daruak,” Adjuntu Diretór hateten, iha ninia knaar fatin, sesta ne’e.

Notísia relevante: Eskola Sekundáriu iha Baucau hein kalendáriu ezame períodu daruak

Eskola Ensinu Sekundariu númeru 02 preparadu no prontu halo tuir orientasaun kona-ba loron ezame no daudaun ne’e matéria ezame prepara ona hein no sei fotokopia halo barak.

Tuir loloos ezame períodu daruak sei realiza iha loron 13 to’o 18 setembru, maibé tanba Baucau ne’e daudaun  kontinua implementa serka sanitária, entaun seidauk iha loron fixu kona-ba alterasaun kalendáriu ezame.

Antes ne’e, profesor sira distribui ona matéria inklui avaliasaun ba estudante sira tantu deretamente no liuhosi rede sosial, nune’e estudante sira estuda no halo konsultasaun ba profesor sira.

“Ita haruka profesor sira halo rezume tinan-ida nian no fó flesibilidade ba estudante atu husu bainhira la komprende,” nia akresenta

Eskola Ensinu Sekundariu númeru 02 iha klase paralelu Uailili no tuir dadus totál estudante hamutuk 1.085, ho klase paralelu hamutuk 82.

Jornalista : Natalino Belo

Editora      : Julia Chatarina

HAKEREK NO HATÁN

Please enter your comment!
Please enter your name here