Diretór servisu Munisipál Edukasaun Covalima hala’o enkontru ho diretór eskola sira. Imajen Tatoli/Celestina Teles

COVALIMA, 09 setembru 2021 (TATOLI) – Servisu  Edukasaun Munisípiu Covalima halo avaliasaun polítika ba implementa programa eskola ba uma.

Ami halo enkontru regular ho diretór eskola sira hodi halo avaliasaun polítika Ministériu kona-bá implementasaun  programa eskola ba uma,” Diretór Servisu Edukasaun Munisípiu Covalima, Edmundo Pereira ba jornalista iha Salaun Edukasaun Covalima, kinta ne’e.

Implementasaun  programa eskola ba uma hahú iha tinan 2020, nune’e  téknikamente eskola sira fahe livru, rezumu matéria ba estudante  hodi entrega ba profesór halo korresaun.

Durante implementa programa eskola ba uma estudante sira kontinua hasoru dezafiu hanesan estudante hela iha área rurál,  lá iha rede internet, Televizaun, Rádiu, no Facebook sai nafatin dezafiu ba estudante sira.

Diretór EBC Dais, Juvinal Francisco haktuir, implementa programa eskola ba uma difikulta ba estudante sira barak maka la akompaña.

“Ami iha difikuldade matéria ne’ebé mak ami foin fahe ba estudante sira, Governu deside implementa Serka Sanitária Tanba evolusaun númeru covid-19,” Juvinal dehan.

Maske implementa serka sanitária, profesór sira kontinua fahe matéria ba estudante sira estuda iha uma, balun estuda no balun la’e,  nune’e   profesór kontinua orienta ba estudante atu aproveita estuda iha uma.

Diretór  eskola Sekundáriu Jerál Públiku  Francelino Carvalho esplika, profesór sira kumpre orientasaun hosi edukasaun hodi fahe matéria rezumu ba estudante sira, iha preokupasaun bele konfirma iha grupu  WhatsApp.

“Ita-nia preokupasaun mak meiu komunikasaun ne’e,  ita liga osan ho situasaun hanesan inan-aman la bele buka osan no difisil tebes,” Francelino tenik.

Jornalista   : Celestina Teles

Editór         : Francisco Simões

HAKEREK NO HATÁN

Please enter your comment!
Please enter your name here