Komunidade ne’ebé sai vítima inundasaun loron 04 abríl 2021 no lakon uma, kontinua hela iha lona okos, iha Manleuana, tersa (07/09). Imajen TATOLI/Francisco Sony

DILI, 08 setembru 2021 (TATOLI)-Vítima inundasaun, loron 04 abríl 2021, evakua ba hela iha lona-okos iha Sede Suku Manleuana, Dili, husu Governu apoiu materiál konstrusaun ba sira tanba agora daudaun tempu udan fali ona fatin  ne’ebé sira hela ba kondisaun la di’ak.

“Ha’u husu ba Governu karik Governu nia planu dehan atu muda ami ba bairru foun ida-ne’e konsege entaun apoiu de’it, ami materiál konstrusaun no osan ruma nune’e ami bele ba fali ami-nia fatin,” Marta Taidi hateten ba Agência Tatoli iha Manleuana, kuarta ne’e.

Nia dehan, Governu tenke ajuda lalais sira tanba agora tempu udan ne’ebé bainhira udan tun mak akompaña ho anin ida risku boot ba sira tanba lona ne’ebé monta sira hodi hela ladún metin.

Iha fatin hanesan vítima inundasaun Fernandes Soares hatutan, durante sira hela lona kondisaun ladún seguru tanba lona manas no toba ho kolxaun mihis de’it ida ne’e mak beibeik sei impaktu negativu hanesan moras ba sira.

Kona-ba hahán sira nafatin hetan apoiu hosi Governu maibé la sufisiente ba sira tanba foos ne’ebé Governu ba fó apoiu ne’e uma-kain rua fahe foos saka ida de’it no mina litru rua ne’e uma-kain ida hetan masa bee aqua $0.25 nian ne’e ida.

“Ami sira oan tolu ba leten han la sufisiente tanba foos ne’ebé ami fahe ba han ne’e liu semana rua mak foin mai apoiu fali, ne’ebé ami presiza tebes mós hahán,” nia dehan.

Koordenadór Vítima inundasaun iha Sede Suku Manleuana, José Abrão Tani, rekoñese katak kondisaun ne’ebé daudaun ne’e vítima sira hela ba la seguru komunidade kontinua hela tanba agora tempu udan fali ona.

“Ha’u hanesan koordenadór vítima inundasaun iha Manleuana husu Governu apoiu lalais materiál konstrusaun ba ita-nia komunidade, nune’e sira ba halo uma hodi hela no sira rai laiha karik  esforsu adia fatin hodi hela,”  nia hateten.

Kona-ba hahán, nia hateten, durante ne’e Governu apoiu nafatin hahán, maibé la sufisiente tanba hahán ne’ebé sira lori ba fahe komunidade foos saka 12 fahe ba uma-kain 48 ne’e la to’o.

Xefe Aldeia Lemo-Kari, Suku Manleuana, Postu Administrativu Dom Aleixo, Munisípiu Dili, Estaqui Tilman afirma, vítima inundasaun ne’ebé hela hamutuk uma-kain 48 ne’ebé uma-kain hitu mak hela iha Manleuana rate-ain no uma-kain 41 mak hela iha sede Suku Manleuana nian, maibé apoiu hahán ba vítima sira durante ne’e la sufisiente.

“Dala ruma ami husu apoiu fali ba laran balu, hanesan indivíduu balu, kompañia lokál no ajénsia internasionál balu mak ajuda nafatin ita-nia vítima sira, tanba ne’e agora iha situasaun COVID-19 komunidade evita komunidade labele halo atividade oin-oin Governu tenke tau matan hahán ne’ebé sufisiente ba vítima sira, tanba sira balu ho oan barak,” nia dehan.

Jornalista   : Arminda Fonseca

Editór         : Francisco Simões.

HAKEREK NO HATÁN

Please enter your comment!
Please enter your name here