Joven hirak ne'ebé PNTL munisipiu Bobonaro detein tanba deskonfia involve iha asaltu-malu iha Suku Ritabou, postu administrativu Maliana, munisípiu Bobonaro, tersa (07/09). Imajen Tatoli/Sérgio da Cruz.

BOBONARO, 08 setembru 2021 (TATOLI)—Polísia Nasionál Timor-Leste (PNTL), munisípiu Bobonaro, detein tán ema balun ne’ebé kontinua asalta-malu iha aldeia Samelaun, suku Ritabou, postu administrativu Maliana, munisipiu Bobonaro, tersa (07/09).

Komandante PNTL munisípiu Bobonaro, Superintendente, Antoninho Mauluta, hateten kazu ne’e hanesan kontinuasaun hosi kazu oho matebian Custódio António de Fátima Páscoa, iha 08 juñu, tanba deskonfia matebian nia-aman mak halo uluk asaun hasoru suspeitu.

Notísia relevante:Sunu uma tolu iha Ritabou, PNTL identifika ema na’in-haat

“Horisehik ita lori ona vítima xefe aldeia nia-kaben, no suspeitu ho inisiál A mós ita lori mai ona, inklui joven balun ne’ebé involve iha kazu ne’e, maibé atu dehan katak, kazu ne’e kontinuasaun. Agora ita halo hela prosesu investigasaun no ita seidauk bele fó-sai,” Superintendente, Antoninho Mauluta informa ba Jornalista-sira, iha knaar fatin, kuarta ne’e.

Polísia konsege halo detensaun, tanba ekipa Task Force koordenada ho Batallaun Órdem Públika no COE, halo kedan intervensaun ba grupu rua ne’e iha fatin akontesimentu, no oras-ne’e iha hela sela detensaun komandu munisípiu Bobonaro hodi hein prosesu tuir-mai.

Maski la temi totál ema ne’ebé oras ne’e iha hela sala detensaun, maibé tuir dadus polísia katak, iha akontesimentu ne’e estraga  uma, motorizada no sasan balun, maibé seidauk iha númernu serteza tanba polisia sei halo hela prosesu identifikasaun.

“Ami seidauk simu relatóriu loloos, kona-bá se mak vítima no se mak na’in ba sasan hirak-ne’e. Tanba akontese horisehik lorokraik ahi mate no ita labele halo kedan prosesu investigasaun, maibé agora prosesu la’o hela,” Antoninho Mauluta hateten.

PNTL kontinua halibur informasaun no evidénsia hanesan sasan no vítima balun nune’e bele kompleta prosesu inveatigasaun.

Parte polísia mós observa katak, dezde akontesimentu kazu omesídiu iha 08 juñu, komunidade iha suku Ritabou ladún halo movimentu inklui atividade ekonómika iha merkadu Maumali mós paradau to’o ohin loron.

Tanba ne’e, Komandu PNTL munisípiu Bobonaro, sei koordena ho Prezidente Autoridade hodi haree asuntu ho sériu  tanba liga ho atividade komunidade ema seluk labele intervein hodi halo limitasaun.

“Ami mós la autoriza kualkér sidadaun atu tuur iha trotoár leten iha tempu kalan, bainhira ami hetan sei halo atuasaun ho rigorozu,” nia subliña.

Kona-bá suspeitu ba kazu krime públiku ofensa integridade fízika hasoru vítima Custódio António Páscoa de Assis, iha fulan juñu 2021, hamutuk na’in 11.

Hosi ne’e na’in-rua kumpre ona prizaun preventiva, na’in-ualu hetan Termu Identidade Rezidénsia (TIR) no ida seluk hetan Aprezentasaun Periódika (AP), hafoin julgamentu ne’ebé hala’o iha Tribunál Distritál Suai iha fulan jullu tinan ne’e.

Jornalista: Sérgio da Cruz

Editór: Cipriano Colo