Diretór Edukasaun RAEOA, Daniel Mauno. Imajen Tatoli/Abilio Elo Nini.

OÉ-CUSSE, 08 setembru 2021 (TATOLI)—Diretór Edukasaun Rejiaun Administrativa Espesiál Oé-Cusse Ambeno (RAEOA), Daniel Mauno, informa daudaun ne’e ekipa hosi Dirasaun Edukasaun halibur ona dadus kandidatu (estudante) sira atu partisipa iha ezame nasionál tinan 2021.

“Peparasaun ita hala’o ona iha semana kotuk. Ita halibur kada eskola sira maibé dadus to’o agora seidauk termina loloos tanba eskola balun seidauk hatama,” Daniel Mauno informa ba Agênsia Tatoli iha Santa Rosa, Oé-Cusse, kuarta ne’e.

Maibé, nia dehan, tuir orientasaun hosi Ministériu Edukasaun Juventude no Desportu (MEJD) hateten iha fulan setembru nia laran ne’e dadus ba kandidatu ezame nasionál tenke fiksa ona hodi haruka ba nasionál, nune’e ministériu bele prepara tuir númeru ne’ebé iha.  

Maske MEJD seidauk publika kalendáriu ba realizasaun ezame nasionál, maibé hanesan servidór Estadu daudaun ne’e hala’o ona preparasaun tanba ezame segundu períodu hala’o tiha ona no iha fulan tolu oin mai sei realiza tan ezame ikus-nian.

Tanba ne’e, nia apela ba inan-aman no kandidatu ezame nasionál sira atu akompaña situasaun ne’e hodi halo preparasaun, tantu hosi Eskola Bázika Sentrál (EBC, sigla portugés), Eskola Bázika Filiál (EBF), Eskola Sekundáriu Jerál (ESG) no Eskola Tékniku Vokasionál (ETV) inklui eskola privada sira.

“Ha’u husu ba kandidatura ezame nasionál tinan 2021, uza tempu feriadu ne’e hodi maneja tempu atu estuda no estuda. Ha’u husu mós ba inan-aman sira atu akompaña oan sira iha uma, fó tempu ba sira atu haree sira-nia materia ba preparasaun iha ezame finál ne’e,” nia apela.

Jornalista : Abílio Elo Nini

Editór        : Cancio Ximenes

HAKEREK NO HATÁN

Please enter your comment!
Please enter your name here