MAPKOMS ho autpridade Munisípiu Ainaro lansa programa Naroman ba Suku iha Suku Mulo, Munisįpiu Ainaro, tersa (07/09). Imajen Tatoli/Arminda Fonseca

AINARO, 07 setembru 2021 (TATOLI)-Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira  Jerónimo, tersa ne’e, halo lansamentu programa Governu iha povu nia leet liuhosi ‘Naroman ba Suku’ iha Suku Mulo, Postu Administrativu Hatu-Builico, Munisípiu Ainaro.

Ministru Francisco Martins da Costa Pereira  Jerónimo, hateten programa Naroman ba Suku ne’e oinsá lori Governu hakbesik ba komunidade hodi rona preokupasaun no problema  saida de’it  mak komunidade henfrenta iha baze tanba ne’e iha lansamentu refere MAPKOMS kontinua halo kedas diálogu ba komunidade suku iha Mulo hodi rona diretamente preokupasaun komunidade nian.

“Ami-nia objetivu lori Naroman ba Suku mai iha komunidade Mulo ne’e oinsá mak ami rona diretamente preokupasaun no problema saida de’it mak ita boot enfrenta durante ne’e. Ami rona no hodi hato’o fali ba ministériu relevante sira, hodi buka solusaun ba problema sira ne’e,” Francisco Martins Jerónimo hateten liuhosi nia diskursu bainhira halo diálogu ba komunidade iha Suku Mulo.

Programa Naroman ba Suku ne’e, dahuluk sei fasilita komunidade  no joven-sira Suku Mulo nian liuhosi kapasitasaun iha área jornalizmu, oinsá maka  sira bele  kobre potensialidade ne’ebé iha suku  hanesan agrikultura, turizmu no rekursu importante sira seluk.

VIII Governu Konstitusionál ninia programa lori Governu ba povu nia leet ne’e, hodi rona povu nia hakarak, hodi hatene komunidade sira-nia preokupasaun, nune’e mós hakarak rona saida mak komunidade sira hakarak no haree saida mak potensiál iha suku ne’e fó sai ba nivel aas nune’e sira bele hatene bele  atrai ema mai iha fatin ida-ne’e.

Iha fatin hanesan Xefe Mulo, José Florindo Andrade, hateten nia parte sente orgullu ho programa VIII Governu, liuhosi Naroman ba Suku iha Suku Mulo tanba liuhosi programa ne’e membru Governu bele rona diretamente problema no difikuldade saida mak komunidade durante ne’e enfrenta.

“Problema no difikuldade ne’ebé ita-nia komunidade hasoru durante ne’e barak,” nia dehan

Iha ámbitu diálogu refere komunidade Estevanos Magalhães, hateten nia parte agradese ba MAPKOMS tanba bele lori ona programa Naroman ba Suku ba sira-nia suku, maibé preokupasaun ne’ebé durante ne’e sira hasoru mak sira iha fatin turizmu barak maibé la asesu ba estrada, liña eletrisidade, no bee-moos ba aldeia sira.

Hatán ba preokupasaun sira ne’e MAPKOMS hateten nia parte anota no sei hato’o ba parte relevante sira hodi responde ba preokupasaun sira ne’e.

Nune’e kona-ba kapasitasaun iha área jornalizmu nian ba juventude Suku Mulo, MAPKOMS hateten ohin halo ona lansamentu ba oin ekipa tékniku hosi MAPKOMS sei fó formasaun durante semana ida.

Iha lansamentu programa Governu iha povu nia leet liuhosi ‘Naroman ba Suku’ ne’e hetan partisipasaun  mós hosi Adjuntu Komandante Polísia Nasionál Timor-Leste (PNTL)  Munisípiu Ainaro, Xefe Gabinete Sekretáriu Estadu Kooperativa (SEKoop), Administradór Ainaro, inklui komunidade Suku Mulo hotu.

 Husu partisipa vasina

Ministru Francisco Martins da Costa Pereira  Jerónimo, husu komunidade Suku Mulo partisipa hotu vasina hodi kontra COVID-19 liuliu variante foun Delta ne’ebé daudaun ne’e sai hanesan inimigu invizivel  iha Timor-Leste.

Nia hatutan, komunidade presiza vasina tanba iha mundu inklui Timor-Leste daudaun ne’e seidauk iha ai-moruk atu halakon propagasaun COVID-19 no ho vasina ne’e bele aumenta komunidade sira-nia imunidade atu enfrenta peste letál ne’e.

“Ha’u husu ba ita hotu liuliu inan-aman sira ne’ebé idozu ona tenke simu vasina tanba idade ne’ebé avansadu ona ne’e imunidade mós menus, tanba ne’e labele fiar lia falsu ka hoax ne’ebé daudaun ne’e buras iha média sosiál hanesan Facebook dehan ema ne’ebé simu vasina nia vida badak labele fiar ida ne’e tanba laiha Governu ida hanoin aat atu oho nia komunidade rasik,” Francisco Martins da Costa Pereira  Jerónimo, hateten liuhosi nia diskursu bainhira halo diálogu ho komunidade suku Mulo, tersa ne’e.

Iha fatin Francisco Magno nu’udar komunidade hateten, nia parte agradese tebes ba MAPKOMS nia prezensa ne’ebé ohin to’o duni sira-nia suku hodi fó korajen vantajen hosi vasina nian ba sira, tanba durante ne’e sira menus informasaun no fiar liu ba lia falsu tauk simu vasina tanba dehan ema ne’ebé simu vida sei badak.

Xefe Suku Mulo, José Florindo Andrade hateten, kona-ba partisipasaun vasina komunidade nian iha suku refere uluk foufoun halo lansamentu vasina, komunidade maioria lakhohi partisipa vasina tanba ho lia falsu ne’ebé espalla maka’as iha média sosiál halo ta’uk sira, maibé ho esforsu Governu nian agora komunidade maioria mak partisipa ona vasina.

“Ohin ho prezensa MAPKOMS mai ko’alia tan ha’u sente ida ne’e parte ida ajuda komunidade oinsá komunidade rasik bele rona diretamente hosi membru Governu sira nune’e sira fiar katak Governu la hanoin aat ba nia povu maibé atu salva,” nia dehan.

Suku Mulo iha aldea ualu (8) hanesan, Aldeia Mulo, Tatiri, Hautio, Aituto, Manumera, Mau-Lahulo, Ble-Heto, no Queo-Rudo ho totál abitante hamutuk 7.630.

Jornalista       : Arminda Fonseca

Editór           : Francisco Simões

HAKEREK NO HATÁN

Please enter your comment!
Please enter your name here