Ministru Justisa, Manuel Cárceres da Costa vizita prizaun Covalima, tersa (07/09). Imajen Tatoli/Celestina Teles

COVALIMA, 07 setembru 2021 (TATOLI) – Iha tinan foun  2022, Ministériu Justisa sei konstroe prizaun foun iha Oeberek.

“Ita konstrui prizaun foun iha Oeberek  ho objetivu prizaun konsentra  iha fatin ida   no ita prodús  prizioneiru sira ho produtivu, nune’e labele fó despeza ba Estadu,” Ministru Justisa, Manuel Cárceres da Costa hateten ba jornalista iha prizaun Covalima, tersa ne’e.

Ministru Manuel Cárceres informa katak Primeiru-Ministru Taur Matan Ruak mós aseita ona palnu konstrusaun prizaun Oebere no hein atu implementa.

 KFP husu guarda prizionál servisu ho professional

Iha fatin hanesan Komisáriu Funsaun Públika  (CFP) asuntu Formasaun, António Freitas husu ba guarda prizionál Covalima tenke servisu ho profisionál labele halo juramentu iha prizaun.

“Ha’u iha evidénsia  fotografia bainhira pesoál balun halo juramentu iha prizaun laran. Ohin,  iha Ministru Justisa nia oin, ha’u hatete ita hotu tau atensaun guarda prizionál  la bele hanesan ne’e ladún di’ak ita mak politiza iha laran,” António Freitas hato’o lia hirak ne’e liu hosi nia diskursu.

Kna’ar funsionáriu públiku tenke servisu ho profisionál ,labele halo juramentu iha prizaun laran ne’e hatudu atitude la di’ak.

 “Ha’u apelu ba guarda sira ida lá bele akontese tan no labele sai polítiku sira-nia instrumentu. imi sai vítima, tanba ne’e Diretór no Xefe Departamentu tenke kuidadu labele halo politizasaun,” António afirma.

Ministru Justisa Manuel Cárceres da Costa hateten kona-ba halo juramentu iha prizaun ministru haruka ona inspetór halo ona investigasaun.

“Ha’u simu telefone hosi komisáriu KFP. Ha’u  hatán labele ansi, nune’e iha loron ida ha’u haruka inspetór mai iha prizaun Covalima  hosi ko’alia ho ita boot sira. Ha’u lee ona no hatún ona orientasaun ita boot sira hein de’it,” Manuel Cárceres  tenik.

Jornalista      : Celestina Teles

Editór           : Francisco Simões

HAKEREK NO HATÁN

Please enter your comment!
Please enter your name here