Prezidente Autoridade Munisípiu Dili Interinu, Atónio Moniz Calau, fó pose ba administradór postu-administrativu Atauro, Dom-Aleixo, Metinaro, Na'in Feto no Vera Cruz. Iha salaun ESTAE, segunda (06/09). Imajen Tatoli/Francisco Sony

DILI, 06 setembru 2021 (TATOLI)-Administradór Postu Administrativu lima hosi Munisípiu Dili, segunda ne’e, simu pose hosi Prezidente Autoridade Munisípiu Dili interinu, António Moniz Clau.

Administradór postu administrativu lima ne’e, maka hanesan Bosco de Jesus Afonso nu’udar  Administradór Postu Administrativu Ataúro, José da Costa Sousa nu’udar Administradór Postu Administrativu Dom Aleixo, Julio Noberto nu’udar Administradór Postu Administrativu Metinaro, Ermina Martins, Administradora Postu Administrativu   Nain Feto ho Manuel Gusmão nu’udar  Administradór Postu Administrativu Vera Crus.

Enposadu sira ne’ebé simu posse ne’e ho mandatu tinan haat; 2021-2025, no sira-nia selesaun tuir méritu ho baze teste rekrutamentu ne’ebé aplika iha administrasaun públika iha Timor-Leste.

Durante prosesu selesaun lidera hosi Vise-Ministru Administrasaun Estatál, Lino de Jesus Torrezão, hanesan prezide juri hodi apoiu Komisaun Funsaun Públika (CFP-sigla portugés) apoiu tomak hahú hosi prosesu selesaun ba méritu hosi fevereiru to’o meadu agostu 2021.

Bazeia dekretu lei númeru 54/2020 alterasaun daruak númeru 3/2016, ne’ebé aprova estatutu Administrasaun Munisipál iha artigu 7 katak administradór postu hanesan titulár kargu xefia administradór ba Prezidente munisipál ka sub delegadu hosi Sekretáriu munisipál ka diretór sevisu munisipál sira hodi jere servisu lokál iha jestaun Administrasaun finansa, planeamentu no dezenvolvimentu lokál komunitária ne’ebé previstu iha diploma ministerial númeru 49/2016.

Iha tomada pose ne’e, António Clau, husu administradór postu administrativu foun na’in-lima, katak konfiansa ne’ebé Governu fó ona ba sira tenke servisu ho responsabilidade lori prezensa Governu nian iha komunidade.

“Sai lideransa ne’ebé di’ak labele depende de’it ba orientasaun hosi superiór, maibé ita rasik tenke iha inisiativa no prepara planu servisu ita-nian rasik oinsá mak lidera, oinsá mak realiza no oinsá mak atu rezolve,” nia hateten.

Servisu seluk ne’ebé daudaun ne’e hein hela administradór foun sira mak hanesan Dili nu’udár sidade nakonu ho ema rasa oioin ne’ebé mai hosi munisípiu 12 inklui Rejiaun Administrativa Espesiál Oé-Cusse Ambeno (RAEOA) ne’ebé ho karakterístika oioin hela iha Dili halo Dili sai sidade maibé dezorganizadu.

“Administradór foun sira tenke koopera ho xefe suku sira, ho parte hotu-hotu tanba lixu la’ós kabe de’it ba kompeténsia Munisípiu Dili nian de’I,t maibé parte hotu hanesan ita hotu lideransa hahú hosi aldeia, suku, administrativu ita hotu nia servisu oinsá kontrola ita-nia sidadaun atu labele soe fo’er arbiru,” nia tenik.

Iha fatin hanesan, Administradora foun Postu Administrativu Nain Feto, Ermina Martins hateten, durante nia mandatu sei serve povu ho di’ak tuir kbiit ne’ebé nia iha no pontu prinsipál mak haree uluk Saúde iha situasaun agora oinsá konsensializa komunidade hodi partisipa vasina, no kontinua obra ne’ebé administradór sesante halo ona antes hanesan programa Mão de Obra ba Postu Administrativu sira.

Jornalista   : Arminda Fonseca

Editór         : Francisco Simões 

HAKEREK NO HATÁN

Please enter your comment!
Please enter your name here