Padre Sebastião Eugénio da Cruz Correia ho autoridade no komunidade sira partisipa serimónia kari ai-funan iha Monumentu Masakre Setembru Negro 1999, Tersa (20/08/2019). Imajen Tatoli/ Dok.Eugénio Pereira

COVALIMA, 05 setembru 2021 (TATOLI) –  Sasin moris masakre setembru negro 1999 iha Suai-Covalima, Rodolfo da Cruz “Samaseco” seidauk bele haluha masakre negro ne’e  tanba rezulta ema barak mate, kanek no balun to’o agora laiha rate.

“Ha’u nia  fuan sei kanek bainhira relembra hikas masakre setembru negro 1999. Hafoin rona rezultadu referendu nian, milísia sira serku metin Igreja Ave Maria Suai, ami halai namkari hodi buka subar fatin, ha’u ho ha’u nia kolega Lourenço da Cruz “Beikessi” subar iha hariis fatin. Ha’u nia ferik oan Martina  Verdial ho ha’u nia oan , subar iha ai kabelak okos, milísia sira hetan oho no sunu ha’u nia ferik oan ho ha’u nia oan. Ami labele halo buat ida,” Rodolfo da Cruz konta nia istória ho matan-ben ba Agência Tatoli iha nia hela fatin, Leogore, domingo ne’e.

Hafoin Rodolfo rona nia ferik oan mate nia ho nia kolega neon lakon. Nune’e, iha tuku haat madrugada ho neon lakon halai sai hosi Igreja haree padre na’in tolu nia mate-isin hamutuk ho kolega sira seluk butuk iha igreja oin.

Ha’u ho ha’u kolega halai  sai tun hosi igreja liuhosi Mata Air  ba Asu Maten la hatene ami lá hatene atu mate ka moris. Maibé momentu ne’e konsege hasoru kolega balun bolu  ami mai han lai. Ha’u hatán ha’u lakohi han ha’u vizita  fali igreja hodi haree ha’u ferik oan ho ha’u nia oan nia mate fatin, tun haree mate isin butuk iha igreja,” nia haktuir.

Ho istória ne’ebé moruk bainhira Governu la iha planu atu selebra Masakre Setembru Negro 1999 tanba COVID-19  halo vítima sira fuan kanek liután hodi konsidera katak Governu la valoriza loron 4 setembru ne’e.

Ha’u fuan kanek seidauk kura bainhira Governu la iha planu atu selebra  Masakre setembru negro 1999 , ema ne’ebé mate iha igreja mate  la’ós tanba sira-nia interese maibé mate tanba nasaun ida ne’e, ohin loron ita hotu haksolok iha sira nia sortimentu,” Rodolfo hateten.

Masakre setembru negro akontese iha loron 06 setembru 1999 ne’ebé sai memória nakukun iha istória Timor Leste nian no istória Suai oan sira nian.

Jornalista   : Celestina Teles

Editór         : Francisco Simões 

HAKEREK NO HATÁN

Please enter your comment!
Please enter your name here