Vise-Ministra Solidariedade Sosiál Signi Chandrawati Verdial. Foto António Goncalves

DILI, 04 setembru 2021 (TATOLI)—VIII Governu Konstitusionál realiza reuniaun Komisaun Revizaun Orsamentu Polítika (KROP) ba proposta Orsamentu Jerál Estadu (OJE) 2022, ne’ebé iha reuniaun ne’e kada instituisaun inklui Ministériu Solidariedade Sosiál no Inkluzaun (MSSI) defende ninia proposta adisionál tuir nesesidade.

Vise-Ministra Solidariedade Sosiál no Inkluzaun (MSSI), Signi Chandrawati Verdial, hateten Konsellu Ministru iha kuarta liubá aprova ona proposta ida hosi implementa projetu pilotu “Bolsa da Mãe Jerasaun Foun” iha tinan 2022, tanba ne’e mak tetu OJE 2022 nian ba MSSI ho valór millaun $18 ne’e lasufisiente, nune’e MSSI hamosu proposta adisionál ho valór orsamentu millaun $6.

“Tetu ne’ebé atribui ba MSSI ne’e millaun $18 no ami husu tan adisionál millaun $6, nune’e implementa projetu pilotu bolsa da mãe jerasaun foun ba munisípiu tolu hanesan Ainaro, Bobonaro no Rejiaun Administrativa Espesiál Óe-cusse Ambeno (RAEOA),” Vise Ministra ne’e relata ba jornalista-sira hafoin hamutuk ho ekipa halo aprezentasaun iha KROP ne’ebé hala’o iha auditoriu Ministériu Finansa (MF), sábadu ne’e.

Governante ne’e husu ba membru KROP atu tetu no konsidera, nune’e tinan oin bele halo ona lansamentu programa bolsa da mãe jerasaun foun ne’e iha munisípiu tolu refere.

OJE 2022 ba MSSI programa prioridade MSSI nian alende bolsa da mãe jerasaun foun, haree mós ba grupu vunerável-sira hanesan inan isin-rua no labarik sira-ne’ebé mak prevee ona orsamentu iha pakote nutritivu atu haree ba situasaun akontese dezastre ka kalamidade boot ruma, ne’ebé orsamentu ne’e prevee foka liubá inan isin-rua no labarik sira.

Jornalista : Antónia Gusmão

Editór        : Cancio Ximenes

HAKEREK NO HATÁN

Please enter your comment!
Please enter your name here