Sekretáriu Jerál FFTL, Nélio Isaac Sarmento. Imajen Tatoli/Egas Cristovão

DILI, 03 setembru 2021 (TATOLI) – Sekretáriu Jerál Federasaun Futeból Timor – Leste (FFTL), Nelio Isaac Sarmento, husu ba Ministériu Saúde atu fó resposta ba karta ne’ebé sira haruka ona ba nune’e bele autoriza selesaun nasionál U-23 no senior atu bele hala’o treinamentu hodi bele partisipa iha jogu pra-kualifikasaun AFC Cup ne’ebé sei hala’o outubru mai ne’e iha Singapura.

“Ita nu’udar sidadaun obedese ba regra saida mak estadu hasai, maibé ami mós fó hanoin fali ba ita-nia Estadu tanba ekipa selesaun nasionál atu ba joga ne’e la’ós defende FFTL no ema ida rua nia naran, maibé defende dignidade no naran  nasaun nian,” Nelio Isaac Sarmento, ba Agência Tatoli iha edifisiu FFTL, Dili, sesta ne’e.

FFTL husu ba Governu atu fó netik espasu uitoan ba selesaun nasionál atu halo preparasaun ne’ebé di’ak.

“Ami komunika beibeik ho Governu, haruka karta ba Ministériu Saúde, maibé to’o agora ami seidauk hetan resposta,” Nelio Isaac Sarmento hateten.

Kondisaun hotu FFTL fó ona ba Governu liuhosi treinamentu iha Konfinamentu Obrigatóriu (KO) nia laran.

“Kondisaun ita prepara mak ne’e, jogadór iha na’in 30 de’it, sira ne’e ita hakarak izola sira hamutuk iha fatin ida de’it, sira hotu vasina dala rua ona, atu izola sira iha fatin ida mós tenke tuir teste swab, ida ne’ebé mak negative kontinua hela iha fatin izola ne’e no ida ne’ebé mak pozitivu foti sai kedan ba izola iha fatin seluk, atu labele prejudika sira iha treinamentu, ami mós sei hala’o treinamentu taka ba públiku laiha ema tama arbiru só jogadór sira de’it ho treinadór,” nia informa.

Durante treinamentu jogadór sira hela iha hotel ne’ebé FFTL mak selu laiha família no ema ruma vizita.

Agência Tatoli tenta hakbesik ba Ministériu Saúde atu konfirma ho ministra, maibé la konsege fó komentáriu tanba okupadu ho servisu esensiál seluk.

Jornalista   : Hortencio Sanchez

Editór            : Francisco Simões

HAKEREK NO HATÁN

Please enter your comment!
Please enter your name here