Diretór Ezekutivu Centro Nacional Chega, Hugo Maria Fernandes. Imajen Tatoli/Egas Cristóvão

DILI, 03 setembru 2021 (TATOLI)-Centro Nacional Chega, Institutu Públiku (CNC I.P) ho Ministériu Saúde (MS), sesta ne’e, iha auditoria CNC, antigu komarka Balide, Dili, asina nota entendimentu kona-ba, oinsá MS fó apoiu tratamentu saúde ba sobrevivente ne’ebé vulneravel, liuliu moras fíziku no mentál.

Diretór Ezekutivu CNC, Hugo Maria Fernandes hateten, CNC ho MS asina nota entendimentu ne’e tanba hahú iha 2019 CNC esforsa estabelese parseria ida ho MS,  atu responde ba rekomendasaun sira relatóriu Chega nian ne’ebé mak haraik hela responsabilidade balu ba iha MS atu implementa.

“Ita haree ba rekomendasaun jerál hosi Chega husu ba MS oinsá fornese servisu saúde públiku ne’ebé di’ak ba populasaun sira hotu, entaun asina nota entendimentu ne’e ho objetivu mak atu fó asisténsia saúde ba vítima ka sobrevivente konflitu pasadu nian hodi fó benefisia sira ne’ebé oferese sira-nia vida tomak ba libertasaun nasionál ne’ebé hela iha Timor-Leste,” Hugo Maria Fernandes hateten liuhosi komunikadu imprensa.

Durante funu timor-oan (feto-mane) barak mak hetan kastigu to’o balu moras, tanba ne’e iha faze  ukun an sira, merese hetan tratamentu ne’ebé di’ak no durante ne’e  MS halo ona tratamentu saúde ba veteranu sira, nune’e  CNC harii foku prinsipál ida mak oinsá halo parseria ida ho MS bele fó tulun ba vítima no sobrevivente vulneravel sira liu-liu moras mentál no fíziku.

CNC no Ministériu Saúde garante katak, sei dezenvolve programa konjuntu liuhosi semináriu, kolókiu no publikasaun sira hodi implementa rekomendasaun Chega! relasiona ho sobrevivente vulneravel sira inklui estabelese mekanizmu implementasaun nota entendimentu ida ne’e liuhosi akordu tékniku mútua.

Hosi parseria ho MS ne’e CNC nia responsabilidade mak fornese dadus tanba durante ne’e CNC-nia divizaun solidariedade ba sobrevivente halo hela rejistu no dadus  ne’e maka sei haruka ba Ministériu Saúde, Ospitál Nasionál, Ospitál referral to’o Postu Saúde administrativu sira.

Kona-ba dadus sobrevivente-sira ne’ebé durante ne’e CNC rekolla hamutuk 2.000 ne’ebé iha baze dadus ne’e sei halo agregasaun  katak hosi 2.000 ne’e ida ne’ebé mak presiza atu hetan atendimentu saúde fíziku, no metal.

“Sobrevivente ne’ebé ho kondisaun mental daudaun halo hela tratamentu hosi PRADET mak hamutuk 26, maibé ita hatene katak sei barak ne’ebé ita kontinua husu nafatin apoiu hosi família bele konta sai vítima sira nia istória, nune’e ita hatene sira-nia moris,” nia haktuir.

Jornalista   : Arminda Fonseca

Editór        : Francisco Simões

HAKEREK NO HATÁN

Please enter your comment!
Please enter your name here