Admistradór postu Venilale foun, Miguel Guterres. Imajen TATOLI/Natalino Belo

BAUCAU, 02 setembru 2021 (TATOLI)—Ministru Admistrasaun Estatál (MAE), Miguel Pereira de Carvalho, delega Prezidente Autoridade Munisípiu (PAM) Baucau, Olívio ‘BouLesa’ Freitas, hodi fó pose ba Miguel Mendes Manso Guterres, nu’udar Admistradór postu Venilale foun ba mandatu tinan-haat.

Liuhosi karta hosi MAE, ne’ebé lee hosi PAM Baucau, Ministru tau konfiansa no husu atu Admistradór foun serbisu ho responsabilidade, ho konviksaun tomak tanba liuhosi selesaun pur méritu mak kompete ho kandidatu hamutuk na’in-tolu iha faze entrevista to’o rezultadu finál.

Admistradór postu Venilale foun, Miguel Guterres, halo juramentu bainhira simu pose, iha CCB Villa antiga, kinta (02/09). Imajen TATOLI/Natalino Belo

“Ha’u husu ita-boot familiariza an ho enkuadramentu legál, halo konsultasaun ho superiór, promove nafatin koordenasaun no serbisu tuir regra hodi garante governasaun bele besik liu ba populasaun sira no promove partisipasaun boot liuhosi sidadaun sira iha atividade administrativa,” mensajen hosi Ministru ba Administrasór emposadu, iha seremónia pose, iha Sentru Konvensaun Baucau (CCB, sigla Portugés), kinta ne’e.

Selesaun pur méritu ba kargu Administradór postu foin ba dahuluk hala’o tuir sistema digitalizasaun (komputadór), ne’ebé aplika iha admistrasaun públika.

Nune’e, selesaun faze dahuluk ba kargu Administradór postu tinan 2021, ho rezultadu ohin hala’o aktu tomada pose ba Admistradór postu Venilale no sei kontinua ba vaga hanutuk 31 iha tinan ne’e nia laran.

Durante prosesu selesaun lidera direta hosi Vise-Ministru Administrasaun Estatál, Lino de Jesus Torrezão, hanesan mós Prezidente juri hodi apoia Komisaun Funsaun Públika (CFP, sigla portugés) durante fulan-neen resin, hahú hosi fevereiru to’o meadu agostu 2021.

Nune’e, sei kontinua móss halo selesaun ba kargu xefia sira iha estrutura sentrál no desentraladu sira iha tinan 2022 mai hodi garante prinsípiu, irregularidade, transparente, partisipasaun no fó oportunidade hanesan ba funsionáriu permanente sira ne’ebé elejível atu aplika.

“Polítika ida-ne’e fixadu iha planu asaun anuál tinan 2022 atu re-strutura programa, boa governasaun no jestaun institusionál kona-ba programa jestaun institusionál no atividade jestaun rekursu umanu,” Ministru Miguel dehan.

Bazeia ba Dekretu-Lei númeru 54/2020, alterasaun daruak dekretu númeru 3/2016, ne’ebé aprova estatutu Admistrasaun munisipál iha artigu 7, katak Admistradór postu hanesan titulár kargu xefia admistradór ba Prezidente munisipál ka sub delegadu hosi Sekretáriu munisipál ka diretór servisu munisipál sira no jere servisu lokál iha jestaun Admistrasaun finansa, planeamentu no dezenvolvimentu lokál komunitária ne’ebé previstu iha diploma ministerial númeru 49/2016.

“Admistradór postu sira rekere servisu ho natureza ezekutiva, iha pensamentu no vizaun estratéjika, ho objesaun rezultadu promove servisu ho exelente no estabelese relasaun produtiva iha servisu inklui sai modelu exemplár no iha integridade,” Ministru dehan.

Administradór foun kompromete rezolve bee-moos no problema rai

Iha fatin hanesan, Admistradór postu Venilale foun, Miguel Mendes Manso Guterres, kompromete sei servisu hamutuk ho autoridade tomak iha Venilale hanesan Polísia Nasionál Timor-Leste (PNTL), Saúde, Xefe suku na’in-ualu, Veteranu antigu kombatente no intelektuál Venilale oan sira, tanba liuhosi maneira hanesan ne’e mak bele hatudu Venilale unidade.

Iha parte seluk, nia kompromete, durante mandatu sei rezolve problema bee-mos ne’ebé durante tinan naruk sai problema ba komunidade Venilale, liuliu buka identifika fundu no bee-matan.

Admistradór postu Venilale foun, Miguel Guterres, simu simbolikamente patrimóniu Estadu hosi Admistradó postu Venilale sesante, Carlos Alberto Guterres, ne’ebé akonpanã hosi PAM Baucau, Olívio ‘Bou-Lesa’ Freitas, iha CCB villa antiga, kinta (02/09). Imajen TATOLI/Natalino Belo

“Ha’u mesak labele, ha’u tenke fila ba kotuk, ami hamutuk la’ós buka de’it Governu, maibé hosi mós Organizasaun Naun Governamentál (ONG) ne’ebé iha dalan atu fó apoia inklui buka fundu no bee-metan hun hafoin bele organiza hamutuk ho parseiru atu dada, ne’ebé bele organiza kapas maibé hun laiha planu labele realiza,” Administradór emposadu hatutan.

Ba kestaun dezenvolvimentu rejiaun ne’e, nia parte sei bolu nai ulun Venilale hanesan Veteranu, Xefi suku ualu no intelektuál Venilale oan atu hamutuk sai forte no dalan ida de’it hodi rezolve kazu disputa rai ne’ebé durante ne’e sempre mosu.

“Desputa rai mak sai problema daruak iha Venilale ne’ebé balun seidauk rezolve, tanba ne’e hau’u sei haka’as an atu rezolve,” Miguel promete.

CFP fó sai karta númeru 4367/2021/CFP hodi konsidera nota númeru 71/DNFP loron 16 agostu kona-ba rezultadu prosesu selesaun méritu kabe ba kompetensia CFP.

Tuir artigu 38 dekretu lei 22/2019 kona-ba rezime konkursu rekrutamentu, selesaun, formasaun pesoál admistrasaun públiku tuir rejimentu interna ne’ebé delega Prezidente ou subtitui legál poder CFP atu promulga rezultadu konkursu públiku interna.

Nune’e Prezidente CFP uza poder bazeia ba Lei númeru 7/2019 loron 15 jullu konjuga ba desizaun antiriór ne’ebé deside rezultadu selesaun meréritu no nomea Administradór foun.

Prosesu selesaun méritu tuir artigu 19 lei númeru 7/2019, kriasaun CFP artigu 63 númeru 2 no Dekretu-Lei 54/2020 loron 28 outubru, alterasaun daruak dekretu lei númeru 3/2016 loron 16 marsu, ne’ebé aprova estatutu Admistrasaun munisipál, autoridade munisipál, atu desentralizasaun munisipál ne’ebé previstu katak Admistradór postu nomea hosi CFP hodi dezamiña funsaun sira iha servisu ho durasaun tinan-haat liuhosi sekuénsia ne’ebé previstu, aprezenta hosi membru Governu responsável admistrasaun estatál.

Jornalista : Natalino Belo

Editora      : Julia Chatarina

HAKEREK NO HATÁN

Please enter your comment!
Please enter your name here