Vise-Prezidente Parlamentu Nasionál, Deputadu Luis Roberto da Silva. Imajen TATOLI/Doc.

DILI, 02 setembru 2021 (TATOLI)–Prezidente Parlamentu Nasionál, Deputadu Aniceto Longuinhos Guterres Lopes, aban (sesta, 03/09) lidera ekipa ida dezloke ba Áustria hodi partisipa konferénsia mundiál kona-bá Uniaun Interparlamentár ka Inter-Parliamentary Union (IPU).

“Aban, Prezidente Parlamentu Nasionál sei hala’o viajen ba Áustria. Viajen ne’e inklui mós ha’u. Ekipa ne’ebé atu ba ne’e mós durante submete ba teste swab ho rútina. Aban ami sai hosi Timor-Leste,” Segundu Vise-Prezidente Parlamentu Nasionál, Luis Roberto da Silva, informa ba jornalista sira, iha uma fukun, kinta ne’e.

Meza prezidénsia ne’ebé hola-parte iha viajen ne’e kompostu hosi Prezidente Parlamentu Nasionál, Deputadu Aniceto Longuinhos Guterres Lopes, Segundu Vise-Prezidente Parlamentu Nasionál, Deputadu Luis Roberto da Silva, no hosi bankada Opozisaun mak Deputadu António da Conceição ‘Kalohan”.

Nia dehan, objetivu hosi viajen ne’e atu partisipa iha programa Inter-Parliamentary Union (IPU) nian ne’ebé konvida Parlamentu Nasionál Timor-Leste.

Ekipa ne’e kompleta ona vasina dala-rua no submete teste swab dala-tolu ona, entaun aban sira sai hosi Timor-Leste ba Malázia depois mak kontinua viajen ba fatin destinasaun Áustria. 

Segundu Vise-Prezidente Parlamentu Nasionál ne’e fó-sai katak, loron 03 setembru sai hosi Timor-Leste no sei fila-hikas mai Timor-Leste iha loron 14 setembru.

Uniaun Interparlamentár (UIP/IPU) ne’e funda iha tinan 1889 nu’udar organizasaun ne’ebé atu rezolve konflitu liuhosi “arbitrajen internasionál.

Tuir sítiu https://www.ipu.org/national-parliaments ne’ebé Agência TATOLI asesu katak Konferénsia Mundiál entre Parlamentu sira iha mundu tomak hala’o iha loron 7 no 8 setembru, iha sidade Viena, Áustria.

Iha sítiu IPU nian fó-sai katak, kada nasaun iha mundu iha forma parlamentu oioin ne’ebé ho sistema parlamentár enkuadra ho kategoria rua: bikameral no unikameral.

Hosi nasaun 193 iha mundu ne’e, iha nasaun 79 mak kategoriza bikameral no nasaun 113 mak kategoriza unikameral, nune’e membru UIP/IPU hamutuk 179.

Nasaun hirak-ne’ebé sai membru UIP/IPU mak hanesan Timor-Leste, Afeganistaun, Albania, Aljeria, Andorra, Angola, Arjentina, Arménia, Austrália, Áustria, Azerbaijaun, Bahamas, Bahrain, Bangladesh, Barbados, Belarus, Beljia, Belize, Benin, Butaun (Bhutan), Brazil, Brunei Darussalam, Bulgaria, Burkina Faso.

Nune’e mós, Burundi, Cabo Verde, Cambodia, Cameroon, Canada, Repúblika Áfrika Sentrál, Chad, Xile, Xina,  Kolumbia, Comoros, Congo, Kosta Rika, Kroasia, Kuba, Cyprus no seluk tán.

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here