Ministru Prezidénsia Konsellu Ministru, Fidelis Mauel Leite Magalhães. Imajen TATOLI/Francisco Sony

DILI, 01 setembru 2021 (TATOLI)—Ministru Administrasaun Estatál (MAE), Miguel Pereira de Carvalho, aprezenta Projetu Dekretu-Lei iha reuniaun Konsellu Ministru (KM), ba alterasaun daruak Dekretu-Lei númeru 8/2013, loron 26 juñu, kona-ba Rejime Jerál ba Programa Nasionál Dezenvolvimentu Suku (PNDS).

“Projetu Dekretu-Lei ne’e ho objetivu atu revee no atualiza valór projetu subsidiadu sira ne’ebé inklui projetu abitasaun sosiál ‘Uma Kbiit Laek’, hodi estabelese katak valór másimu verba nian $125.000 to’o ba konkluzaun projetu refere,” Ministru Prezidénsia Konsellu Ministru, Fidelis Manuel Leite Magalhães, relata, hafoin ramata reuniaun ezekutivu, iha auditorium Ministériu Finansa, Aitarak-laran, kuarta ne’e.

Antes ne’e, Governu aloka orsamentu millaun $25 ba konstrusaun Uma Kbiit Laek hamutuk 1.254 iha munisípiu 12 la inklui Rejiaun Administrativa Espesiál Oé-cusse Ambeno (RAEOA).

Benefisiáriu ba Uma Kbiit Laek iha munisípiu Aileu 99, Ainaro 62, Baucau 177, Bobonaro 150, Covalima 90, Dili 24 de’it tanba Postu Administrativu Ataúro ho Metinaro mak hetan Uma Kbiit Laek ne’e, Ermera 156, Lautém 102, Liquiçá 69, Manatuto 93, Manufahi 86 no Viqueque 108.

Entretantu, Uma Kbiit Laek hanesan programa VIII Governu Konstitusionál liuhosi PNDS, atu fó tratamentu dignu ba sidadaun.

Governu estabelese kritériu ba banefisáriu sira hanesan ema vunerável ka ema ne’ebé kbiit laek, idozu ona, kondisaun uma rezistente a’at duni no redimentu mínimu, maibé mós tenke iha rai.

Jornalista : Antónia Gusmão

Editora      : Julia Chatarina

HAKEREK NO HATÁN

Please enter your comment!
Please enter your name here