Diretór Servisu Edukasaun Baucau, Augusto Hornai Ximenes. Imajen TATOLI/Natalino Belo

BAUCAU, 01 setembru 2021 (TATOLI)—Diretór Servisu Edukasaun Baucau, Augusto Hornai Ximenes, hateten, Autoridade munisipál iha ona planu atu implementa projetu infraestrutura edukasaun iha tinan ne’e.

“Munisípiu Baucau hetan projetu hamutuk 30, hosi programa ne’ebé hanaran konstrusaun no reabilitasaun infraestrutura edukativa, ita halo planu iha tinan 2020 no aprezenta ba Ministériu Edukasaun, Juventude no Desportu (MEJD), maibé aprova de’it projetu 26, hafoin haree ba situasaun maka ministériu aprova tan adisionál haat, nune’e sei iha projetu 30,” Diretór Edukasaun Baucau hateten iha ninia knaar fatin, kuarta ne’e.

Tuir Augusto, loloos implentasaun projetu atu hahú iha fulan-abríl ka maiu tinan ne’e, maibé tanba situasaun pandemia entaun atividade formasaun molok tama implementasaun projetu adia no ohin mak foin hahú.

Hafoin aprovasaun orsamentu hodi implementa projetu, diretór eskola sira mak sei lidera grupu komunitáriu no loke konta bankária, ba implementasaun programa ‘projetu komunitáriu’.

“Matadalan liuhosi diploma ministeriál, tanba ne’e Ministériu Edukasaun, Juventude no Desportu liuhosi Diresaun Nasionál Dezenvolvementu Eskolár ohin mai halo formasaun ba team leader sira (diretór), ne’ebé hanesan benefisiáriu atu forma grupu komunitáriu atu implementa programa,” nia akresenta.

Projetu ne’e, ba eskola ida sei hamosu mínimu sala aula rua no másimu neen, ne’ebé munisípiu Baucau hamutuk iha sala aula 98 mak sei konstrui no reabilita iha postu admistrativu Baguia, Laga, Quelicai, Venilale no Baucau villa.

Enkuantu, daudaun ne’e diretór eskola hamutuk ho tékniku hosi edukasaun sei iha faze dezeñu detalladu no Bill of Quantity (BOQ).

“Projetu 30 ne’e balun hanesan konstrusaun foun no balun reabilitasaun, nune’e automátikamente nia orsamentu la hanesan, entaun hafoin ramata formasaun maka bele loke konta bankária hodi aprezenta orsamentu, nune’e bele hetan transferénsia hodi implementa projetu,” nia hatutan.

Eskola ne’ebé mak sei sai benefisiáriu hosi projetu ne’e hanesan Ensinu Sekundáriu Públiku Filiál Baguia sei konstrui sala tolu inklui toilet no sala profesór, Ensinu Báziku Filiál (EBF) Ossolia Quelicai konstrui sala tolu no toilet, EBF Darlai Laisoru-lai Quelicai sala tolu no toilet.

Ensinu Sekunáriu númeru 1 Baucau villa sala tolu no Laboratóriu, Ensino Báziku Sentrál (EBC, sigla portugés) Lawateri sala tolu no sala profesór, EBC Osso-huna rehabilitasaun sala neen.

EBF Uakala konstrusaun sala tolu, Pre-eskolár amizade Venilale sala rua, toilet, kuziña no armazen.

Maski nune’e, kada tinan Autoridade munisipál ho koordenasaun Servisu Edukasaun munsipál sei kontinua aprezenta kondisaun infraestrutura ba Governu sentrál atu nafatin tau atensaun tanba eskola barak mak laiha kondisaun.

Biban ne’e, Diretór Servisu Edukasaun ne’e agradese tanba hosi projetu ne’e bele hadi’a  infraestrutura eskola ne’ebé laiha kondisaun.

“Kada tinan ita sei kontinua aprezenta planu konstrusaun, maibé depende ba forsa orsamentu Governu, maibé agradese tanba ministériu oferese projetu balun ba Baucau tanba haree númeru alunu no eskola barak,” nia hatutan.

Projetu hirak ne’e tuir alvu sei hahú implementa iha novembru 2021 no sei termina iha abríl 2022.

Jornalista : Natalino Belo

Editora      : Julia Chatarina

HAKEREK NO HATÁN

Please enter your comment!
Please enter your name here