Selebrasaun kontratu entre PAM Baucau, Olívio 'Bou-Lesa' Freitas no empreza manan-na’in hitu ba implementasaun projetu PDIM, iha salaun reuniaun Administrasaun munisipál, Villa nova, kuarta (01/09). Imajen TATOLI/Natalino Belo

BAUCAU, 01 setembru 2021 (TATOLI)–Admistrasaun munisípiu Baucau selebra kontratu ho empreza hitu, ne’ebé nu’udar manan-na’in atu implementa projetu konstrusaun moru merkadu no sede suku neen liuhosi orsamentu Planu Dezenvolvementu Intergradu Munisipál (PDIM) ba tinan 2021.

Prezidente Autoridade Munisípiu (PAM) Baucau, Olívio ‘Bou-Lesa’ Freitas, husu empreza ezekuta obra ho responsabilidade.

“Hau hato’o parabéns, maibé tenke implementa ho responsabilidade mós, tanba ita-bo’ot sira simu hanesan naha todan ne’ebé tenki hala’o,” PAM Baucau hateten iha Admistrasaun Munisipál, Villa nova, kuarta ne’e.

Tuir Bou lesa, empreza vensedór projetu liu ona prosesu konkursu no kumpre rekezitu ein termu administrativa no téknika, tanba ne’e PAM garante projetu sei konklui ho di’ak atu nune’e tinan 2022 hetan nafatin konfiansa hosi Governu sentrál ba PDIM.

“Ita-bo’ot sira mak iha direitu atu ezerse obra ne’e, maibé ha’u ezije kualidade no tenki ramata tuir tempu, labele husik hela iha dalan klaran,” Autoridade munisipál hameno.

Iha fatin hanesan, Diretór empreza Wranger unip lda, Julio de Araújo Correia, garante sei finaliza obra tuir kalendáriu, maski sei iha difikuldade iha prosesu tanba situasaun serka sanitária no kuaze materiál konstrusaun sei sosa iha Dili.

“Bazeia ba kontratu, hafoin asina ami bele ona implementa maski iha situasaun serka sanitária,” Julio hateten.

Liuhosi prosesu konkursu públiku, kompaña Wranger manan konkursu ho valór $52.000, ne’ebé sei konstrui sede suku Uaigae ho medidas 6×15, iha postu admistrativu Vemasse.

Empreza hitu ne’ebé sai manan-na’in projetu PDIM maka Gardelu unip lda sei harii moru haleu merkadu tuanau, Rozi unip lda sei harii sede suku Samalari, Mexa unip lda sei harii sede suku Samalari, postu Baguia, Minsilys unip lda harii sede suku Lelalai, Costa Estalia unip lda konstrusaun sei harii sede suku Atelari, Caidaralata unip lda sei harii sede suku Uailaha no Wranger.

Totál orsamentu ba konstrusaun moru merkadu hamutuk $360.653,40, enkuantu konstrusaun sede suku pur volta $60.000 resin, ho totál orsamentu PDIM hamutuk $746.825,53.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here