Diretór Ezekutivu BNCTL, Brígido de Sousa. Imajen TATOLI/António Gonçalves

DILI, 31 agostu 2021 (TATOLI)-Banku Nasionál Komérsiu Timor-Leste (BNCTL, sigla portugés) hahú halo akizisaun ba mákina transasaun atu fasilita kliente sira foti osan ho lalais.

“Ami sosa ona mákina unidade 100 ne’ebé sei to’o iha Dili iha fulan-dezembru 2021 atu fasilita kliente sira sosa sasán ka servisu la uza osan cash,” Diretór Ezekutivu BNCTL, Brígido de Sousa, informa ba Agência TATOLI, via telefónika, tersa ne’e.

Banku Komérsiu ne’e hakarak aumenta Automated Teller Machine (ATM) iha territóriu tomak, nune’e aumenta ATM foun 27, ATM móvel lima no ATM drive-thru rua inklui instala ATM ne’ebé bele uza depozita osan.

Banku estatál ne’e adere ona ATM rede P24 atu fasilita tranzasaun entre banku sai efisiente liután.

Aleinde ne’e, BNCTL halo hela diskusaun atu fasilita kliente sira iha área remota no urbana uza fasilidade sistema e-wallet hodi foti osan ka tranzasaun seluk liuhosi ajénsia Telemor Mosan, ne’ebé iha ona kliente kuaze 400 iha territóriu tomak.

Biban ne’e, Diretór Ezekutivu banku komersiál ne’e husu deskulpa ba kliente sira tanba dalaruma hosoru kestaun tékniku hodi hamosu fallansu iha transasaun.

“Ami rekoñese katak iha problema tékniku balun kauza hosi ATM falla atu serví ita-bo’ot sira. Balun tanba ahi-mate, liña internet mós avaria inklui falla mós iha monitorizasaun,” Dirijente dehan.

Nune’e, nia kompromete atu hadi’a fallansu no fó atendimentu di’ak liután ba kliente.

“Ami konta nafatin ho ita-bo’ot sira-nia apoiu, krítika, reklamasaun, no sujestaun iha mídia sira, ne’ebé ajuda hadi’a tebes atu transforma BNCTL sai banku ne’ebé oferese servisu di’ak liu,” nia agradese.

Kona-ba desizaun konfinamentu obrigátoriu iha kapitál Dili, BNCTL kontinua fó atendimentu, maibé limita atendimentu iha Dili no Gleno-Ermera, hahú segunda to’o sesta tuku 09:30 to’o 14:00 lorokraik, enkuantu ba sukursál iha munisípiu seluk kontinua funsiona normál iha oras servisu.

Jornalista : Florêncio Miranda Ximenes

Editora     : Julia Chatarina

HAKEREK NO HATÁN

Please enter your comment!
Please enter your name here