ViSe Prezidente AFO RAEOA, Julio Coel. Imajen Tatoli/Abílio Elo Nini

OÉ-CUSSE, 31 agostu 2021 (TATOLI)—Assosiasaun Futeból Oé-Cusse (AFO) Rejiaun Administrativa Espesiál Oé-Cusse Ambeno (RAEOA), tuir planu sei realiza Copa AFO RAEOA sub-22 ne’ebé sei hala’o abertura jogu kontinuasaun hosi 2020 ne’e iha fulan-outubru 2021.

“Sei realiza abertura iha fulan outubru. Preparasaun ne’e tenke másimu tanba sei husu autorizasaun mós hosi Autoridade RAEOA tanba situasaun COVID-19. Se kazu pozitivu aumenta no laiha autorizasaun hosi autoridade, mak jogu ba Copa AFO ne’e ita sei adia ba tempu seluk. Tuir kalendáriu kada tinan sempre realiza, entaun ba tinan 2021 komisaun planea ona sei realiza iha outubro ne’e,” Vice Prezidente AFO, Julio Coel, informa ba Ajênsia Tatoli iha Santa Rosa Oé-Cusse, tersa ne’e

Atualmente preparasaun la’o daudaun ona hanesan prepara kampu, ekipamentu seluk nune’e hein de’it iha fulan setembru ne’e nia laran, komisaun ezekutivu AFO sei halo reuniaun atu realiza ka lae, tanba tuir lolos kalendáriu Copa AFO realiza duni iha fulan outubru 2021.

Bainhira Assosiasaun Futeból Oé-Cusse (AFO) ne’e eziste iha Oé-Cusse iha 2019, sira hahú organiza atividade kompetisaun Futeból nivél sekundáriu, realiza copa Referendu ba joventude sira, no iha outubru 2020 ami hahú realiza Copa AFO ba sub-22.

Vice prezidente AFO ne’e hateten, durante ne’e AFO hetan fundu hosi Federasaun Futeból Timor-Leste (FFTL) kada fulan $1,000 maibé montante ne’e fahe ba rua. Pursentu 30 uza ba administrasaun no 70% uza ba realizasaun atividade, nune’e fundu sira-ne’e kada fulan tau hamutuk to’o fulan dezembru durante tinan ida mak foin realiza Copa ida.

“Durante realizasaun Copa ida, tuir esperiénsia katak Copa ida nia gastu minimál $3,500 no maksimál $5000. Gastu hirak ne’e inklui ona selu árbitru, premiu, fasilidade desportu nian no hamoos kampu,” nia dehan.

Jornalista : Abílio Elo Nini

Editór       : Cancio Ximenes

HAKEREK NO HATÁN

Please enter your comment!
Please enter your name here