Ministru Turizmu Komérsiu no Indústria, José Lucas do Carmo da Silva. Imajen TATOLI/Egas Cristóvão

DILI, 27 agostu 2021 (TATOLI) Ministériu Turizmu, Komérsiu no Indústria (MTKI) hein Commitment Payment Voucher (CPV) hosi Ministériu Finansa (MF) atu distribui Cesta Bázika ba reklamante.

Ministru Turizmu, Komérsiu no Indústria, José Lucas do Carmo da Silva, konfirma, simu ona  lista pendete válidu ka lista sidadaun ne’ebé seidauk simu Cesta Bázika hosi Ministériu Koordenadór Asuntu Ekonómika (MKAE) atubele responsabiliza distribuisaun.

“Ami simu ona karta hosi MKAE ne’ebé fó responsabilidade ba MTKI mak sei ezekuta distribuisaun Cesta bázika ba lista pendente hotu. Daudaun ne’e iha ona prosesu iha Ministériu Finansa atu prodús CPV,” Ministru informa iha ninia knaar fatin, Bebora, sesta ne’e.

Lista pendente hosi Ministériu Administrasaun Estatál (MAE) submete ona ba MKAE hamutuk 25.569 hosi uma-kain 5.651.

Hafoin MF prodús ona CPV mak MTKI hahú buka empreza sira atubele hahú distribuisaun Cesta Bázika ba komunidade sira ne’ebé tama lista pendente.

“Ita sei halo identifikasaun ba kompañia sira hodi  kontrata,” nia akresenta.

Progresu distribuisaun Cesta Bázika hosi entidade implementadór ba benefisiáriu sira atinje ona 96,5% hosi populasaun 1.503.563, iha suku hamutuk 452, maibé suku rua no aldeia tolu mak sei pendente hela tanba komunidade rejeita simu tanba la konkorda ho kuantidade sasán.

Ministériu implementadór Cesta Bázika hanesan MTKI responsável ba suku 118, ho benefisiáriu 658.608, Ministériu Agrikultura no Peska (MAP) kobre iha suku 47 ho nia benefisiáriu 106.782, Sekretáriadu Estadu Kooperativa (SEKoop) kobre iha suku 183 ho benefisiáriu 434.055, Sentru Lojístika Nasionál kobre suku 86 ho nia benefisiáriu hamutuk 215.875, no Rejiaun Adminitrativu Espesiál Oé-cusse Ambeno (RAEOA) kobre iha suku 18 ho benefisiáriu 84,243.

Jornalista : Florêncio Miranda Ximenes

Editora      : Julia Chatarina

HAKEREK NO HATÁN

Please enter your comment!
Please enter your name here