Xefe Armazén MSSI Covalima, Osorio Mendonça do Carmo. Imajen Tatoli/Celestina Teles

COVALIMA, 27  agostu 2021 (TATOLI) – Ministériu Solidariedade Sosiál no Inkluzaun (MSSI ) Covalima liuhosi Sentru Solidariedade Sosiál (CSS), hahú iha jullu to’o agostu,  tinan ne’e, fó  apoiu ona foos  saka 1,601  ba família vulneravel sira.

“Ami apoiu ona foos saka 1,601 ba família vulneravel iha Munisípiu Covalima,” Xefe Armazén MSSI Covalima, Osorio Mendonça do Carmo, informa ba Agência Tatoli iha edifísiu MSSI Covalima , sesta ne’e.

Foos hirak ne’e MSSI fó apoiu ba família vulneravel iha postu administrativu sira hanesan Suai Villa ba família vulneravel hamutuk 795, Tilomar ba família vulneravel 122, Maucatar ba família vulneravel 358, Zumalai ba família 326.

“Ba Postu Administrativu Fatululik no Fatumea ne’ebé mak ami seidauk halo distribuisaun foos ba oin ami sei distribui bazeia planu distribui hosi CSS kolabora ho autoridade lokál nune’e família vulneravel sira bele hetan apoiu hosi MSSI Covalima,” Osorio hateten.

Stoke  foos iha armazén Covalima foin lalais saka 3,000, maibé distribui ona foos 1,601 ba família vulneravel sira.

CSS Covalima la’ós atende de’it família vulneravel sira, maibé fó apoiu mós ba  uma Mahon Salele, Sentru Treinamentu Claret. Ho nune’e, foos oras ne’e daudaun iha armazén Covalima hela de’it sala 300.  Nune’e, MSSI Covalima sei haruka pedidu ba MSSI nasional husu tan foos saka 300-resin.

Jornalista   : Celestina Teles

Editór        : Francisco Simões

HAKEREK NO HATÁN

Please enter your comment!
Please enter your name here