Produtu Cesta Bázika iha bote-laran Imajen TATOLI/Antónia Gusmão

DILI, 26 agostu 2021 (TATOLI)—Governu liuhosi Ministériu Administrasaun Estatál (MAE) esforsu atu atribui Cesta Bázika ba reklamante cesta bázika iha territóriu Timor-Leste liuhosi nia traballadór ajente públika sira.

Notísia Relevante: PN husu Governu selu reklamante Cesta Bázika

“Ita esforsu nafatin atu ita-nia populasuan reklamante sira mós simu Cesta Bázika. Governu implementa programa Cesta Bázika ne’e la’ós fasil tanba ita atribui ne’e labele hotu iha tempu badak de’it tanba momentu ne’ebá ne’e Governu fó ita fulan rua, entaun ita labele aselera. Entaun Governu hola desizaun hodi hanaruk tan tempu to’o fulan-jullu,” Diretór Jerál MAE, Belarmino Filomeno Neves, hateten ba Agência TATOLI, iha nia knaar fatin, Colmera, Dili, kinta ne’e.

Diretór Jerál MAE hateten, ho pandemia COVID-19 ne’ebé ho volume sa’e makaas entaun entidade fornesedór sira la konsege halo distribuisaun hotu, maibé Governu konitnua prolonga distribuisaun ne’e to’o 31 jullu. 

“Maibé ita labele konklui atribuisaun Cesta Bázika iha prazu determinadu tanba pandemia COVID-19 ne’e. Tanba ne’e Governu tetu ida-ne’e to’o fulan jullu nia rohan ho benefisiáriu iha territóriu nasionál ne’ebé mak simu ona ka konkluindu Cesta Bázika hamutuk 1.503.563,” nia hateten.

Entidade fornesedór sira kontinua halo distribuisuan Cesta Bázika ne’e maibé lista reklamante ne’ebé autoridade haruka mai no MAE submete ona ba Ministériu Koordenadór Asuntu Ekonómiku (MAKE) ne’e hamutuk 25.569 hosi uma-kain 5.651.

Kona-ba atu atribui ne’e, nia dehan, MKAE mak hatene bainhira mak implementa no MAE nia parte rekolla no verifika dadus hodi submete ba MAKE no dadus reklamante ne’e MAE submete tiha ona.

Progresu distribuisaun Cesta Bázika hosi entidade implementadora ba benefisiáriu sira atinje ona 96.5% hosi populasaun 1.503.563, hosi suku 452 maibé suku rua (2) no aldeia tolu (3) mak sei pendente hela tanba komunidade iha diferensa ideia kona-ba sasán Cesta Bázika.

“Entaun, fornesedór sira labele distribui no daudaun ne’e sei iha prosesu negosiasaun ho sira, nune’e Governu sei halo distribuisaun ida-ne’e,” nia dehan.

Entidade implementadór sira hanesan Ministériu Turizmu Komérsiu no Indústria (MTCI-sigla portugés) distribui iha suku hamutuk 118 ho benefisiáriu hamutuk 658.608; Ministeriu Agrikultura no Peska (MAP) kobre iha suku 47 ho nia benefisiáriu hamutuk 106.782.

Sekretáriu Estadu Kooperativa (SECoop), kobre iha suku 183 ho benefisiáriu 438.055; Sentru Lojístika Nasionál (CLN-sigla portugés) kobre iha suku 86 ho nia benefisiáru hamutuk 215.875; no Rejiaun Administrativa Espesiál Oé-cusse Ambeno (RAEOA), kobre iha suku 18 ho benefisiáriu hamutuk 84,243.

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here