Prezidente Aautoridade Munisípiu Dili, Guilhermina F.S. Ribeiro. Imajen Tatoli/dok

DILI, 26 agostu 2021 (TATOLI)—Diretór Dirasaun Nasionál Administrasaun Lokál-Ministériu Administrasaun Estatál (MAE-DNAL), Elisio Verdial dos Santos hateten, tanba COVID-19 MAE suspende serimónia fó posse ba Prezidente Autoridade Munisípiu (PAM) Dili foun Guilhermina Filomena Saldanha Ribeiro.

Notísia Relevante: Posibilidade, PAM Dili simu posse semana oin

“Tuir loloos serimónia toma posse ba ita-nia PAM Dili sei realiza iha loron sesta (3 setembru 2021) maibé tanba horisehik (kuarta, 25/08) Governu aplika hikas konfinamentu obrigatóriu ba Munisípiu Dili, entaun ita mós tenke suspende atividade hotu-hotu,” Elisio Verdial dos Santos hateten ba Agência TATOLI, iha nia knaar fatin, Colmera, Dili, kinta ne’e.

MAE suspende fali serimónia toma posse ba PAM Dili no seidauk bele deisde bainhira mak MAE fó pose, hein de’it bainhira situasaun la’o normál ona mak MAE bele deside fali data foun ba simu pose nian tanba kazu pozitivu COVID-19 sa’e maka’as.

Prosesu toma pose ba Prezidente Autroidade Munisípiu Dili bazea ba Rezolusaun Governu nú 104/2011, 11 de Agostu, ne’ebé mak públika ona iha Jornal de República.

Tanba úniku iha Timor-Leste, Prezidente Autoridade Munisípiu Dili nian foin mak feto no seluk mesak mane hotu, nia dehan, tanbe ne’e MAE fó atensaun makaas ba konvidadu feto sira hanesan membru Parlamentu Nasionál (PN), membru Governu sira hotu inklui feto ne’ebé mak servisu iha Organizasaun Naun Govermentál (ONG) sira atu partisipa iha pose ne’e.

“La’ós nia tan feto de’it maibé nia mós matenek no méritu duni no iha duni kapasidade jestaun no intelektuál atu asume no hala’o knaar iha PAM Dili ne’e. Tanba antes ne’e nia diretora iha instituisaun Governu nian,” nia dehan.

Tuir loloos, iha tempu no loron hanesan (sesta, 03 setembru) MAE fó pose mós ba Administradór na’in-27 hosi Postu Administrativu 27 nian iha parte lorokraik maibé hosriseik (kuarta, 25/08) Governu aplika hikas konfinamentu obrigatóriu iha loron 27 agostu ho oras 00:00 entaun MAE suspende tiha atividade hirak ne’e.

Administradór Postu Administrativu ne’ebé atu simu posse mak Administradór hosi Munisípiu Aileu mak Administradór Gastão Mendonça hosi Postu Remexio, Munisípiu Baucau nian mak Administradór Miguel Mendes Guterres hosi Postu Venilale, Munisípiu Bobonaro mak Administradór Juvinal Leto Mau dos Santos hosi Postu Bobonaro Vila, Alfredo Meta Dao hosi Postu Caicalo, no Administradór Tomas Lacu Loi hosi Postu Maliana.

Munisípiu Covalima mak Administradór Luzino do Rego hosi Postu Zumalai, Munisípiu Dili mak Administradór Bosco de Jesus Afonso hosi Postu Ataúro, Administradór José da Costa Sousa hosi Postu Dom Aleixo, Administradór Júlio Norberto hosi Postu Metinaro, Administradora Herminia Martins hosi Postu Na’in Feto no Administradór Manuel Gusmão hosi Postu Vera Crus.

Munisípiu Ermera mak Administradór Lino Tavares hosi Postu Administrativu Atabae, Administradór Constancio da Silva hosi Postu Atsabe, Administradór Alexandre dos Santos Salsinha hosi Postu Ermera Vila, Administradór Luis Manuel hosi Postu Hatolia, Administradór Tomas da Costa Soares hosi Postu Railaco, no Administradór António Manuel Soares hosi Postu Letefoho.

Munisípiu Liquiça mak Adiministradór Alberto Rosa Belo hosi Postu Liquiça Vila, Munisípiu Lautém mak Administradór Jacob dos Resi hosi Postu Iliomar, Administradór Dinis dos Santos Baptista hosi Postu Lospalos no Administradór Albino de Araújo hosi Postu Tutuala.

Munisípiu Manatuto mak Administradór Abílio da Cunha hosi Laclo no Administradór Cosme Ximenes hosi Postu Laleia, Munisípiu Manufahi mak Administradór Adelino de Araújo hosi Postu Same no Munisípiu Viqueque mak Administradór Alfredo dos Santos hosi Postu Uatucarabau no Administradór Manuel do Rosário hosi Postu Uatulari.

Tuir nia, bainhira COVID-19 laiha entaun planu fó posse ba Administradór sira sei fó pose iha ida-idak nia munisípiu ho serimónia simples de’it, nune’e MAE ezonera tiha Administradór sesante nia funsaun para foun ne’e bele hala’o ona nia servisu.

“Signifika ita fó husik ona servisu ba Administradór foun sira, ita labele husik Postu Adminsitrativu mamuk de’it. Ita tenke entrega ona termu de servisu ba sira ona. Tanba bainhira ita seidaduk entrega termu de servisu katak servisu sei mamuk hela,” nia hateten.

Despaixu ne’e liuhosi desizaun Komisaun Funsaun Públika (CFP) númeru 4367/2021/CFP, no ida-ne’e mak uza hodi foti rezultadu por merito nune’e nomeia ba Administradór Postu sira.

Jornalista : Osória Marques

Editór        : Cancio Ximenes

HAKEREK NO HATÁN

Please enter your comment!
Please enter your name here