Sekretáriu Estadu Kooperativa, Elizário Ferreira no komitiva halo vizita iha grupu produsaun multi-setorál Moris Mesak, iha suku Mehara, kuarta (25/08). Imajen/SEKoop

LAUTÉM, 25 agostu 2021 (TATOLI)–Sekretáriu Estadu Kooperativa (SEKoop), Elizário Ferreira, halo vizita ba grupu produsaun multi-setorál Zlauhe Moris Mesak, iha suku Mehara, postu administrativu Tutuala, munísipiu Lautém, no kompromete atu apoia habelar atividade produsaun.

“Vizita ba grupu produsaun no kompromete ba sira atu habelar atividade hakiak ikan, bibi no manu ho kualidade di’ak no liuhosi apoia Sekretaria Estadu Kooperativa, ita tenta buka merkadu ba sira,” Sekretáriu Estadu hateten ba Agência TATOLI, iha ámbitu vizita iha suku Mehara, Postu Administrativu Tutuala, kuarta ne’e.

Grupu produsaun ne’e foin harii iha fulan-neen liubá, ho membru na’in-16, kompostu hosi feto haat no mane 12, ho fundu ne’ebé mai hosi kontribuisaun kada membru hosi $5 to’o $50.

Durante vizita, governante ne’e nota katak, grupu ne’e akumula maioria joven, nune’e motiva liután serbisu no iha espíritu hodi halo produsaun barak liután.

“Ita motiva no suporta sira, nune’e iha futuru bele sai kooperativa ne’ebé maka institusionalizadu, sustentável no dezenvolvidu,” nia akresenta.

Iha biban vizita ne’e, Sekretáriu Estadu enkoraja grupu produsaun ne’e atu hola parte iha kooperativa kréditu uniaun Adorada hodi asesu ba merkadu.

Notísia relevante: Pose estrutura, SEKoop husu Kooperativa Adorada Tutuala atu fiar malu

“Sira ne’e  tenke rejista iha Sekretaria Estadu Kooperativa iha nasionál hodi ita bele halo promosaun, nune’e bainhira ema presiza sira-nia produtu atu hola bibi karik kontaktu de’it no membru sira la presiza la’o dook,” nia hatutan.

Aleinde ne’e, SEKoop kompromete sei apoia grupu produsaun multi-setorál Moris Mesak Mehara iha atividade hakiak ikan.

“Imi elebora proposta ruma no dirije ba SEKoop, ha’u  sei ko’alia ho Sekretáriu Estadu Peska, tanba daudaun ne’e Governu prepara hela fini atu fahe,” nia fó hanoin.

Iha fatin hanesan, Reprezentante grupu produsaun multi-setorál Moris Mesak Mehara, Flávio da Costa Almeida, haksolok ho vizita Sekretáriu Estadu no espera bele hetan apoia atividade produsaun.

“Iha grupu tolu, balun hakiak bibi, manu, ikan no kuda modo. Ami kona-ba hakiak sira ne’e mak seidauk asesu ba merkadu nasionál, durante ne’e ami fa’an manu no bibi ba komunidade sira iha Lospalos villa, tanba iha ne’ebá ema asesu barak no modo ami fa’an ba komunidade sira besik iha ne’e,” nia dehan.

Modo hanesan tomate, brinjela, mostarda no seluk tan, kuda iha rai ektare 1,5, ne’ebé hetan rendimentu kada loron $30, enkuantu manu no bibi depende ba demanda merkadu.

“Ami hetan rendimentu maibé dalaruma ami rai hodi haforsa ami-nia grupu balun hodi bele fahe malu,” nia tenik.

Jornalista : Natalino Costa

Editora     : Julia Chatarina

HAKEREK NO HATÁN

Please enter your comment!
Please enter your name here