Joven Timoroan na'in-haat ne'ebé hakat ilegál hosi Atambua mai Timor-Leste, kuarta (25/08). Imajen Tatoli/Sérgio da Cruz.

BOBONARO, 25 agostu 2021 (TATOLI)—Polísia Nasionál Timor-Leste (PNTL), Komandu munisípiu Bobonaro, serbisu hamutuk ho ekipa konjunta, detein tan joven na’in-haat ne’ebé hakat ilegál hosi Atambua Indonézia mai Timor-Leste (TL).

“Sidadaun na’in-haat ne’e orijen hosi Bobonaro, ne’ebé horikalan parte Serbisu Informasaun Polísia (SIP) detekta iha komunidade nia uma no halo kedan kapturasaun,” Komandante PNTL, munisipiu Bobonaro, Superintendente, Antoninho Mauluta, informa ba jornalista-sira iha salaun administrasaun munisipál Bobonaro, kuarta ne’e.

Notísia relevante:Ekipa konjunta PNTL konsege redús atividade ilegál iha fronteira

Informasaun hosi Komandu munisípiu Bobonaro katak, sidadaun hirak-ne’e tama ilegál hosi fronteira Alto Lebos no Serbisu Informasaun Polisia deteta hodi halo kedan kapturasaun iha área Rai-Maten, Suku Odomau, postu administrativu Maliana, munisípiu Bobonaro 24:00 otl.

“Ita-nia  membru-sira lori kedan Komdandu, tanba kalan boot ita labele entrega kedan ba parte serbisu saúde. Ita halo de’it detensaun preventiva iha sela Komandu,” nia hateten.

Rezultadu identifikasaun hosi  parte seksaun investigasaun komandu munisípiu Bobonaro, katak, joven na’in-haat ho inisiál RDC idade 22, AMP 18, NGS 23 no EDR idade 22 ne’e, orijen loloos hosi Mabelis, Lebos, postu adminidtrativu Lolotoe, munisipiu Bobonaro.

Komandu PNTL Bobonaro konklui ona identifikasaun no tuir planu joven na’in-haat ne’e sei entrega ba serbisu saúde munisipál atu transporta ba Batugade hodi submete kuarentena durante loron 14, hafoin loke preseu invetigasaun tuir lei.

Relasiona ho movimentu ilegál ne’ebé kontinua akontese, Komandu munisípiu Bobonaro mós koordena nafatin  ho Unidade Patrullamentu Fronteira no Batallaun Orden Públika (BOP) no Kompañia Operasaun Espesial, inklui FALINTIL Forsa Defeza Timor-Leste.

Tuir  informasaun ne’ebé komandu Bobonaro simu, aban kinta (26/08) autoridade seguransa Indonézia sei deporta tan sidadaun na’in 25 mai imigrasaun Timor-Leste.

Alende ne’e, Komandante UPF, Superintendente, Euclides Belo, iha Sentru Formasaun Polísia Comoro, apela nafatin ba komunidade iha liña fronteira, atu informa ba parte seguransa bainhira ema ruma foin fila hosi nasaun viziñu Indonézia, hodi kumpre protokolu saúde iha kuarentena.

Dekretu Governu númeru 18/2021, 1 jullu, kona-bá medida ezekusaun deklarasaun Estadu emerjénsia efetua hosi dekretu Prezidente Repúblika númeru 39/2021,30 juñu, ne’ebé iha artigu 7 obrigatóriu kontrola sanitária, iha alinea 4 hateten, ba individu ne’ebé tama sai territóriu nasionál ho dalan ilegál sei hetan sansaun koima ho valór minimu $30 no másimu $250.

Jornalista: Sérgio da Cruz/Nelson de Sousa

Editor: Cipriano Colo

HAKEREK NO HATÁN

Please enter your comment!
Please enter your name here