Primeiru-Ministru, Taur Matan Ruak ho membru Governu relevante debate kona-ba pedidu estensaun ba deklarasaun Estadu Emerjénsia hosi Prezidente Repúblika, iha sala plenária Parlamentu Nasionál, tersa (24/08). Imajen TATOLI/Egas Cristóvão

DILI, 25 agostu (TATOLI)—Parlamentu Nasionál fó apresiasaun ba nasaun sira-ne’ebé apoia Timor-Leste luta kontra hasoru propagasaun surtu COVID-19.

“Ami-nia apresisaun boot ba iha apoiu hosi nasaun viziñu sira-ne’ebé ajuda Timor-Leste luta hasoru Virus SARS COVID-19 no ba apoiu kampaña vasinasaun, espesialmente ba Governu Austrália, Estadu Unida Amérika, Xina, Portugál, Nova Zelándia no Japau ne’ebé mak oferese vasina tantu Astrazeneca no mós Sinovac, atubele apoiu Governu nia kampaña ba halo vasinasaun,” Xefe Bankada Frente-Mudança (FM), Deputada Isabel Maria Barreto Freitas Ximenes, fó apresiasaun ne’e liuhosi estensaun estadu emerjénsia ba dala-XVII, iha uma fukun.

Ho variante Delta ne’ebé tama ona iha Timor-Leste, nia husu VIII Governu Konstitusionál kontinua luta kontra COVID-19 no komunidade internasionál mós apoia Timor-Leste hasoru virus invizivel ne’e.

Xefe Bankada Frente-Mudança ne’e apresia ho Governu nia sensibilidade ba situasaun ida-ne’ebé komesa pior iha ikus-ikus ne’e.

Bankada Frente-Mudança hato’o sentida kondelénsia ba família hosi na’in 48 ne’ebé mak lakon sira-nia vida tanba SARS-CoV-2.

Nune’e mós hato’o soliedaridade tomak ba família boot médiku no pesoál Timor-Leste nian ne’ebé mak infetadu ho Virus SARS-CoV-2 no ekipa liña frente sira hotu.

Entretanttu, Deputadu Bankada KHUNTO, Luis Roberto da Silva, fó apresiasaun ba nasaun sira-ne’ebé durante ne’e apoia Timor-Leste luta kontra hasoru surtu COVID-19.

“Ita la mesak hasoru moras ne’e maibé mundu tomak, no ita-nia nasaun amigu sira apoia ita liuhosi vasina Aztrazeneca no Sinovac. Ita agradese ba ida-ne’e,” nia dehan.

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here