Misa Funerál Vigáriu Jerál Padre Francisco Pinheiro e Silva, ne'ebé prezide hosi Bispu Dioseze Baucau, Don Basílio do Nascimento, iha Igreja Katedrál Santo António, Villa Antiga, kuarta (25/08). Imajen TATOLI/Natalino Belo

BAUCAU, 25 agostu 2021 (TATOLI)—Igreja Katólika Timor-Leste, liuliu Dioseze Baucau lakon figura importante Vigáriu Jerál, Padre Francisco Pinheiro e Silva, ne’ebé konsideradu hanesan kakutak ba mudansa Dioseze Baucau.

Vigáriu asuntu Pastorál Dioseze Baucau, Padre Arlindo Leonardo Siqueira da Silva. Imajen TATOLI/Natalino Belo

Vigáriu asuntu Pastorál Dioseze Baucau, Padre Arlindo Leonardo Siqueira da Silva, haktuir, Padre ne’e hahú sente mal despostu iha loron tersa (17/08) bainhira partisipa retiru anuál amu lulik no bainhira sente isin manas, Padre Pinheiro deskansa de’it iha ninia rezidénsia ho kondisaun normál, maibé iha tersa (24/08) madrugada Padre Pinheiro hakotu iis.

Antes ne’e, kondisaun Padre Pinheiro kontroladu no halo atividade formasaun profesór iha Eskola Katólika Dioseze Baucau no atividade seluk tan.

“Ba Dioseze Baucau nia pesoál sentrál no kakutak ba mudansa lubun ne’ebé hala’o iha Dioseze, nia nonok la hatene ko’alia barak, bainhira ko’alia buat ne’ebé ensensiál, homoris nia ema ne’ebé iha flesibilidade, maski hanesan Vigáriu Jerál maibé hanesan ema simples no lahatene hirus,” Padre Arlindo hateten ba Agência TATOLI, iha Igreja Katedrál Santo António, Villa Antiga, kuarta ne’e.

Tuir Pedre Arlindo, Vigároiu Jerál ne’e hanesan Padre ne’ebé úniku, maski iha Padre barak maibé presiza tempu atu hetan fali figura hanesan Pinheiro.

“Dioseze Baucau lakon tebes figura importante, ita bele dehan nia biblioteka moris ho konseitu lubun ida ne’ebé nia halo no nia hanesan úniku pesóal ne’ebé péritu iha istória Igreja Katólika,” nia akresenta.

Ohin, Iha Igreja Katedrál Baucau, Igreja Timór, no Sarani Dioseze Baucau, Saran Padre Francisco Pinheiro e Silva, ba Aman Maromak nia futar kadunan santo.

Nune’e, Padre Francisco Pinheiro e Silva nia dedikasaun tomak hakerek ona iha istória Igreja Katólika Timór.

Bispu Dioseze Baucau, Don Basílio do Nascimento, hato’o omenajen ikus hafoin ramata misa funebre iha Igreja Katedrál Santo António, Villa antiga, Baucau, kuarta (25/08). Imajen TATOLI/Natalino Belo

Molok ba haloot iha simiteiru, prosesu funebre hahú ho misa ne’ebé prizide hosi Bispu Dioseze Baucau, Don Basílio do Nascimento no akonpanã hosi Bispu Dioseze Dili, Don Virgílio do Carmo no Bispu Dioseze Maliana, Don Noberto, Padre, Madre, família, estudante no sarani Dioseze Baucau.

Padre Francisco Pinheiro e silva, moris iha loron 16 outubru 1963, iha aldeia Urufou, suku Hola-rua, postu administrativu Manufahi, munisípiu Manufahi, no hanesan oan hosi Luís de Araújo e Silva no Julieta da Silva e Pinheiro.

Nia simu sakramentu baptismu iha novembro 1963, sakramentu krisma hosi Mons. Martinho Lopes iha Misaun Fatumaka no frekuenta Ensinu Primária, segunda no terseira klase iha tempu portugués.

Padre Pinheiro ho família tomak halai ba Foho Kablaki, bainhira Militár Indonésia hahí bombarde rai Timór, hosi tinan 1975 to’o 1978.

Nune’e, ramata estudu iha Fatumaka durante tinan neen, hahú hosi tinan 1979 to’o 1985 no kontinua estudu iha Pendidikan Guru Agama Katolik (PGAK) iha Balide hosi tinan 1985 to’o 1988.

Ho karta Don Carlos, Padre Pinheiro kontinua estudu Semináriu Propedeutiku iha Semináriu Menor Lahane, hahú tinan 1988 to’o 1989.

Kontinua formasaun espirituál iha Malang, Indonézia, hahú hosi tinan 1989 to’o 1990 no foti Filosofia no Teologia iha Seminari Tinggi Filsafat dan Teologi (STFT) Widya Sasana Malang, Indonézia iha tinan 1990 to’o 1994.

Halo estájiu nu’udar Frater iha Paroquia Ainaro hosi tinan 1994 to’o 1995 no ramata tia estájiu, filafali ba Semináriu Malang hodi konklui ninia estudu filosófiku no teolójiku iha tinan 1995-1997.

Ramata tiha estudu, Frater Francisco Pinheiro e Silva, simu Ordenasaun Diasonál iha Igreja Katedrál Malang hosi Mons. Herman Pandoyo, O’Carm, Bispo Diocese Malang, iha loron 22 fevereiru 1997.

Hafoin simu tiha Ordenasaun Diasonál nian, Diákonu Francisco Pinheiro e Silva fila hikas mai Timór no hala’o nia estájiu Diasonál iha Paroquia Soibada.

Iha loron 23 novembru 1997, Diákonu Francisco Pinheiro e Silva, simu Ordenasaun Sacerdotál hosi Bispu Don Basílio do Nascimento no sai hanesan primeiro fruto ordenado liman moruk Don Basílio do Nascimento iha Igreja Katedrál Baucau.

Hafoin simu Ordenasaun Sacerdotál, Bispo Diocese Baucau, Padre Francisco Pinheiro e Silva kontinua serbisu iha Paroquia Soibada hanesan Segundu Vigáriu ne’ebé responsável ba Estasaun Misionária Laclubar.

Iha tinan 2000, transfere ba Paroquia Ossu nu’udár Vigário Paroquial, hafoin tinan ida iha Paroquia Ossu, Bispo Baucau haruka Padre Pinheiro kontinua nia kursu espesialidade iha área História da Igreja iha Universidade Gregoriana, Roma iha tinan 2001 to’o 2004.

Nune’e, fila hosi Roma, Padre Francisco Pinheiro e Silva simu provizaun hosi Bispu Baucau nu’udar Pároko iha Paroquia Ossu hosi tinan 2004 to’o 2006.

Iha tinan 2006, hetan nomeasaun nu’udár Vigário Jerál Dioseze Baucau to’o agora no halo mós knaar hanesan Dosente iha Instituto Superior de Filosofia e Teologia Dom Jaime Garcia Goulart, Fatumeta, Dili, desde 2006 to’o agora.

Bainhira Conferência Episcopal Timorense (CET) harii Komisaun Nasionál Edukasaun Katólika Timor Leste (CONECTIL, sigla portugés), nomeia Padre Francisco Pinheiro nu’udár Prezidente Ezekutivu komisaun to’o ohin loron.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here