Ministru Asuntu Parlamentár no Komunikasaun Sosiál (MAPKOMS), Francisco Martins da Costa Jerónimo, fó pose ba vogál konsellu administrasaun RTTL, E.P, Altide Maria da Costa Santos. Iha Palasiu Governu, kuarta (25/08). Imajen Tatoli/Francisco Sony

DILI, 25 agostu 2021 (TATOLI)-Ministru ba Asuntu Parlamentár no Komunikasaun Sosiál (MAPCOMS-sigla portugés), Francisco Martins da Costa Pareira Jerónimo, kuarta ne’e, iha Palásiu Governu, fó tomada pose ba Altide Maria da Costa Santos, hodi troka João Baptista Florindo da Costa ba kargu vogál Konsellu Administrasaun iha Rádiu Televizaun Timor-Leste Empreza Públika (RTTL,E.P).

Ministru ba Asuntu Parlamentár no Komunikasaun Sosiál, Francisco Martins da Costa Pareira Jerónimo, hateten, MAPKOMS fó pose ba Altide Maria da Costa Santos hodi sai vogál Konsellu Administrasaun ba RTTL,E.P tanba bazeia ba despaixu númeru  12/G-MAPCOMS/VIII/2021.

“Tanba nomeasaun MAPCOMS ita halo kleur ona maibé tanba horiseik (24/08) foin fó sai iha Jornál Repúblika entaun ohin foin fó tomada pose. Tanba ne’e ha’u-fiar katak, liuhosi tomada pose ohin ne’e, Altide Maria da Costa Santos bele ba hamutuk ho Prezidente RTTL,E.P hodi realiza RTTL nia mehi sai di’ak liu tan, liuliu fornese informasaun ne’ebé kredivel ba povu nune’e povu bele sente katak sira iha televizaun ne’ebé di’ak fó informasaun ba sira,” Francisco Martins da Costa Pareira Jerónimo ba jornalista-sira hafoin fó tomada pose ba Altide Maria da Costa Santos .

Altide Maria da Costa Santos iha nia kompromisu ba onra hetan nia sei obedese tuir Konstituisaun RDTL no leál ba nasaun durante iha nia mandatu ba vogál Konsellu Administrasaun RTTL,E.P.

“Ha’u jura sei obedese tuir regulamentu ne’ebé iha no sei hala’o tuir funsaun ne’ebé fó ona mai ha’u no sei tau interese aas nasaun nian, no ha’u jura sei servisu di’ak ba públiku serve komunidade, povu ho onestidade, profisionál hodi tau interese nasaun nian,” nia dehan.

Durante nia mandatu pontu importante ne’ebé nia sei hamutuk ho Prezidente RTTL, E.P atu halo mak oinsá hadi’a edifísiu RTTL nian, transporte ba jornalizmu no haree atividade funsionáriu nian hodi hadi’a di’ak liu tan.

“RTTL nu’udár Empreza Públika tenke hadi’a sai di’ak, tanba RTTL antes ne’e VII Governu ha’u simu tiha ona kargu vogál Konsellu Administrasaun iha RTTL maibé Governu iha mudansa ha’u mós sai maibé ne’ebé ohin ha’u simu fila-fali knaar ne’e, ha’u ba hamutuk ho Prezidente RTTL no funsionáriu sira seluk sei servisu hamutuk ba RTTL. nia di’ak,” nia hateten.

Jornalista   : Arminda Fonseca

Editór        : Francisco Simões

HAKEREK NO HATÁN

Please enter your comment!
Please enter your name here