Ajente públiku hosi institusaun Estadu iha Baucau tuir sensibilizasaun Lei MPCC, hosi Komisáriu CAC, Sérgio Hornay, iha CCB, Villa antiga Baucau, kuarta (25/08). Imajen TATOLI/Natalino Belo

BAUCAU, 25 agostu 2021 (TATOLI)–Komisaun Antí Korrupsaun (CAC, sigla portugés) partilla informasaun ba ajente públiku kona-ba rejime deklarasaun rendimentu bens interese iha lei númeru 7/2020 Medida Prevensaun no Kombate Korrupsaun (MPCC, sigla portugés).

Komisáriu CAC, Sérgio Hornay, hateten, komisaun daudaun ne’e halo hela akompañamentu no hahú aplika ona sistema baze dadus liuhosi verifikasaun formalidade ba dokumentu.

“Ita mai partilla ho sira no fó hatene kona-ba objetivu prinsipál hosi rejime deklarasaun rendimentu bens interese, ba ita-nia kargu xefia iha nível munisipál sira, hahú hosi Prezidente Autoridade Munisípiu (PAM) no Diretór hosi liña ministeriál sira ne’ebé destakadu iha munisípiu,” Komisáriu CAC informa ba Agência TATOLI, iha Sentru Konvensaun Baucau (CCB, sigla portugés), Villa antiga, kuarta ne’e.

Tuir Sérgio, sensibilizasaun ne’e bele ajuda ajente públiku hosi kargu xefia sira iha munisípiu bele iha koñesimentu no fasil atu kada tinan halo arolamentu no aprezentasaun deklarasaun ba autoridade kompetente.

“Ita iha esperansa, hotu-hotu nia ideia hakarak atu iha koñesimentu kle’an kona-ba lei ida-ne’e atubele fasilita ajente Estadu sira, nune’e labele monu ba konflitu interese sira no aprezenta deklarasaun rikusoin hosi saláriu no rikusoin ne’ebé iha nanis,” nia akresenta.

Atividade ne’e tenke iha kontinuasaun permanente no konstante, atu nune’e ajente Estadu tomak bele tulun autoridade kompetente asegura transparánsia, akuntabilidade no boa governasaun.

Iha fatin hanesan, Diretór Admistrasaun Fiskalizasaun Munisípiu no atuál Inspetór, Bernardo Hornay, hateten, matéria ne’ebé partilla importante tanba orienta atu diretór no xefe departamentu hotu partisipa.

“Hakarak ka lakohi ita tenki divulga rikusoin ba públiku, nune’e bele hatene no bele fó koñesimentu ba Estadu liuhosi CAC no bele halo sistema kontrolu,” nia hatutan.

Nune’e, nia garante bainhira aplika Lei MPCC no rejime deklarasaun rikusoin bele minimiza korrupsaun iha Timor-Leste.

“Sensibilizasaun hanesan ne’e karik bele halo kle’an liután, la’ós ba de’it kargu xefia maibé ba funsionáriu públiku hotu, nune’e bele hatene kontiúdu lei refere,” nia tenik.

Sensibilizasaun ne’e partisipa hosi diretór serbisu munisipál hosi liña ministeriál no xefe departamentu iha Admistrasaun munisipál Baucau.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here