Ilustrasaun torre eletrisidade. Imajen/Espesiál

MANATUTO, 24 agostu 2021 (TATOLI)-Xefe Suku Hoho-Rai, Postu Administrativu Laclo, Munisípiu Manatuto, Albino Soares informa, uma-kain  317 iha Suku Hoho-Rai seidauk asesu ba liña eletrisidade.

“Ha’u-nia suku aldeia haat, hanesan, Hatu-Ermera, Miri-Hun, Hatu-Anahun, no Ani-Colau, uma-kain 317eletri ho totál populasaun 1.359 dezde 1999-2021 seidauk asesu bá liña eletrisidade,” Albino Soares ba Agência Tatoli iha Manatuto, tersa ne’e.

Aleinde eletrisidade, problema seluk ne’ebé sira hasoru mak bee-moos no estrada. Tanba tuir Xefe Suku ne’e, iha tempu bailoron nia komunidade tenke la’o ain to’o kilometru rua mak kuru bee-moos

“Ba estrada difikulta tebes ami bainhira ita atu lori produtu ruma bá postu Administrativu Laclo no Munisípiu Manatuto, problema sira ne’e ita hato’o dala barak ba parte relevante, maibé seidauk hetan resposta ruma,” nia dehan.

Hatán ba preokupasaun sira ne’e Administradór Munisípiu Manatuto, Bernardo Lopes hateten, katak nia parte iha ona polítika atu apoiu  komunidade ne’ebé seidauk asesu ba liña eletrisidade.

“Nu’udár autoridade Manatuto ha’u hola ona alternativu aprova ona uma-kain 437 iha suku lima Postu Administrativu Laclo nian inklui suku Hoho-Rai atu hetan solar panel iha tempu badak,” nia hateten.

Nia dehan,  ida-ne’e projetu UNDP nian, semana ne’e, materiál hahú tama atu halo instalasaun ba komunidade ida-idak nia uma, tanba atu hetan liña eletrisidade presiza uluk estrada entaun, komunidade ne’ebé hela dook alternativu dahuluk mak solár panel.

Kona-ba ba bee-moos nia dehan, komunidade maioria labele hetan bee-moos tanba komunidade hela iha foho leten, bee-matan iha fali foho-okos entaun atu dada bee ba foho leten presiza eletrisidade, entaun bainhira fahe ona solár panel ba komunidade, sira bele hetan bee-moos no ba estrada iha hotu ona planu.

Jornalista   : Arminda Fonseca

Editór         : Francisco Simões

HAKEREK NO HATÁN

Please enter your comment!
Please enter your name here