ABF iha Munisípiu Aileu ho inisiativa halibur ema ho defisiente no LGBTI kuda modo no ai-funan hodi fa’an. Imajen/Espesiál

DILI24 agostu 2021 (TATOLI)—Diretór Sentru Formasaun Institutu Matadalan Intregradu (IMI), Joaquim Exposto, hateten Sentru Formasaun Institutu Matadalan Intregradu (IMI) sei fó formasaun movel kona-ba produsaun hortikultura ba negosiante hamutuk na’in45 iha munisípiu Ermera.

Joaquim Exposto hatutan, formasaun movel ne’e foku ba ba produsaun hortikultura ba komunidade sira iha suku sira-ne’ebé identifika hanesan benefisiáriu hodi hasa’e produsaun hortikultura hodi bele hetan rendimentu liuhosi atividade kuda modo.

“Formasaun movel ne’e, ami sei konvida negosiante sira hodi bele fó formasaun konabá oinsa tékniku kuda modo, tékniku hili no hakiak fini no mós oinsa negosiante sira bele halo manutensaun ba produsaun sira, nune’e bele hasa’e kresimentu ba produsaun ne’e,” Joaquim Expostu, hateten ba Agência Tatoli, via teléfonika, tersa ne’e.

Objetivu hosi formasaun movel ne’e atu hasa’e grupu benefisiáriu sira-nia kuñesimentu konabá tékniku kuda modo no sei lori programa ne’e ba iha komunidade ne’ebé hela iha área rurál no suku sira atu sira bele asesu.

Formasaun ne’e, lori komunidade bele ba hetan rendimentu ekonomia ne’ebé mai hosi atividade ne’ebé sira rasik halo liuhosi hasa’e produsaun, nune’e sira lori sirania produsaun ne’e hodi asesu ba iha merkadu no bele hetan rendimentu hodi sustenta sirania família, selu oan sirania eskola, inklui bele hadi’a mós sirania uma.

“Sentru ne’e mós prepara ona modulu konabá oinsa atu kuda modo ne’ebé di’ak, hahú hosi kuda modo to’o kolleta,” nia dehan.

Formasaun movel dadaun ne’e seida’uk la’o tanbá munisípiu Ermera aplika hela serka sanitária, no konfinamentu domisiliáriu ne’ebé bandu komunidade halo movimentu ba-mai no labele halibur malu liuh ema na’in-10 ba leten.

“Maske, ami asina ona kontratu ho SEFOPE iha loron 6 fulan agostu tinan ne’e, maibe aminia koordenasaun liuhosi kontaktu ho autoridade lokál no grupu benefisiáriu sira la’o ona. Ami hein de’it. Bainhira serka sanitária no konfinamentu obrigatóriu Governu bele loke filafali, nune’e ami bele la’o movel ba-mai, entaun ami sei hala’o formasaun movel ne’e ba benefisiáriu sira,” nia dehan.

Hosi formasaun movel ne’e, tuir dadus ne’ebé sentru ne’e foti, liuhosi aproximasaun, iha grupu tolu ne’ebé iha benefisiáfiu hamutuk na’in45, mai hosi munisípiu Ermera mak sei tuir formasaun movel ne’e.

“Grupu tolu ne’e mai sei tuir formasaun tanba ami fó tiha ona formasaun no ami rekolla ona informasaun. Hamutuk ho SEFOPE ami konvida grupu benefisiáriu sira mai iha aminia sentru, depois sira halo entrevista diretamente inklui mós antes ne’e ami halo aproximasaun ba sira. Ne’ebé, iha grupu tolu ne’e, kada grupu ida ami identifika benefisiáriu na’in15 no totál hosi grupu tolu ne’e hamutuk na’in45 ne’ebé kompostu hosi feto na’in20 no mane na’in25,” nia informa.

Benefisiáriu 45 ne’e mai hosi suku tolu mak hanesan maihosi suku Dukurai ne’ebé lokaliza iha Postu Administrativu Letefoho no iha Munisípiu Ermera mak iha suku Riheu no Suku Humboe.

Entretantu, totál fundu ne’ebé Sekretariu Estadu Formasaun Profesional Empregu (SEFOPE), fó apoiu ba Sentru Formasaun Institutu Matadalan Intregradu (IMI) hamutuk $.9,532.40 hodi realiza formasaun movel iha área agrikultura ka hortikultura.

Jornalista : Nelia Fernandes

Editór       : Cancio Ximenes

HAKEREK NO HATÁN

Please enter your comment!
Please enter your name here